“McDonald’s Azərbaycan” şirkətinin Almaniyadan olan tədarükçüləri AQTA-nın qiymətləndirməsindən uğurla keçib

Azərbaycan Qida Təhlükəsizliyi Agentliyi (AQTA) tərəfindən Almaniya Federativ Respublikasında yerləşən, Azərbaycana ət və ət məhsulları idxal edən “OSI Food Solutions Duisburg" və “OSI Food Solutions Günszburg" zavodlarının istehsal müəssisələrində qiymətləndirmə aparılıb və həmin müəssisələrdə istehsal edilən məhsulların respublikamızın gömrük ərazisinə idxal olunmasına icazə verilib. 

Həmin obyektlər AQTA mütəxəssislərinin yerində apardıqları qiymətləndirmənin nəticəsinə uyğun olaraq təsdiqlənib. 

Qiymətləndirilmə zamanı həmin müəssisələrin ət qəbulu, eləcə də emal və köməkçi sahələrinə baxış keçirilib. 

Eyni zamanda, obyektlərdə baytarlıq-sanitariya, sanitar-gigiyenik və sanitar-texniki tələblərin təmin edilib-edilməməsi izlənilib. Qida təhlükəsizliyi baxımından müvafiq tələblərə əməl olunduğu üçün həmin müəssisələrin fəaliyyəti məqbul hesab edilib. 

Qeyd edək ki, “OSI Food Solutions Duisburg” zavodu 1988-ci ildə Almaniyanın Rur bölgəsinin mərkəzində, “OSI Food Solutions Günszburg” zavodu isə 1979-cu ildə Günzburq şəhərində qurulub. 

Bu zavodlarda istehsal edilən məhsullar Almaniya və digər Avropa ölkələrinin bazarlarına tədarük edilir. 

Zavod və avadanlıqlara qoyulan müntəzəm investisiyalar istehsal prosesini ən qabaqcıl texnologiyalarla təmin etməyə imkan verir. Məhsulun keyfiyyətinə, qida məhsullarının və əməyin təhlükəsizliyinə, ətraf mühitə və dayanıqlı inkişafa bütün parametrlər üzrə xüsusi diqqət yetirilir. 

Zavodda mütəmadi olaraq müxtəlif təşkilatlar tərəfindən yoxlamalar və audit aparılır. Şirkət yüksək standartlar səviyyəsində sertifikatlara (IFS 7, ISO 14001, EMAS III və s.) layiq görülüb. 

Bizim.Media xəbər verir ki, 1news.az məsələ ilə bağlı araşdırma apararaq, qeyd olunan müəssisələrin “McDonald’s Azərbaycan”ın tədarükçüləri olduğunu müəyyən edib.

“McDonald’s Azərbaycan” şirkəti bu müəssisələrdən ət və toyuq məhsulları idxal edir. 

1news.az-ın müxbiri bu mövzuda “McDonald’s Azərbaycan”ın keyfiyyətə nəzarət və təchizat üzrə direktoru Anar Osmanovla söhbət edib. 

- “McDonald's Azərbaycan” qida tədarükçülərini hansı prinsip əsasında seçir? Seçim prosesində hansı meyarlar əsas götürülür? 

- İlk növbədə qeyd edim ki, “Qida təhlükəsizliyi haqqında” Qanuna uyğun olaraq “McDonald’s Azərbaycan” şirkəti Keyfiyyət Assosiasiyası ilə birgə tədarükçülərin yoxlamasını təşkil edib. 

“McDonald’s”ın yüksək standartlarını nəzərə alaraq, tədarükçülərimizin hər biri müntəzəm olaraq müstəqil beynəlxalq audit şirkətlərinin auditi də daxil olmaqla ciddi yoxlamalardan keçir.

Bu yoxlamalar əmək şəraitindən tutmuş təhlükəsizliyə qədər hər şeyi, o cümlədən heyvan sağlamlığının monitorinqini və istehsal prosesinin hər mərhələsinə nəzarəti əhatə edir. 

- Bildiyimiz qədərilə, “McDonald’s Azərbaycan” yerli tədarükçülərlə əməkdaşlığı fəal şəkildə inkişaf etdirir.

Yerli şirkətlər də eyni dərəcədə ciddi seçim prosesindən keçir? 

- Məhsulların təhlükəsizliyinə və keyfiyyətinə nəzarətlə bağlı əsas tələblər var.

Mütəxəssislərimiz bu standartlara uyğunluğu diqqətlə qiymətləndirirlər. Seçim zamanı yüksək keyfiyyətə zəmanət verə bilən və korporativ siyasətimizi bölüşən tərəfdaşlara üstünlük veririk.

Biz də öz növbəmizdə onların inkişafını, o cümlədən ixrac imkanlarını dəstəkləyirik. İstehsalın lokallaşdırılması regionda yeni iş yerlərinin açılmasına da töhfə verir. Biz yerli biznes ictimaiyyətinin inkişafına töhfə verərək milli istehsalçıları fəal şəkildə dəstəkləyirik. 

“McDonald’s” şirkəti özünün Məsuliyyətli Tərəfdaşlıq Siyasəti vasitəsilə uzunmüddətli əməkdaşlığa çalışan tədarükçülərə bu sahədə lider olmaqda kömək etmək üçün onları innovativ texnologiyalar, keyfiyyətə nəzarət və təhlükəsizlik sistemləri tətbiq etməyə təşviq edir. 

Qeyd edək ki, “Qida təhlükəsizliyi haqqında” Qanuna uyğun olaraq, respublikamıza qida məhsulları idxal olunan xarici ölkələrdə fəaliyyət göstərən obyektlərin təsdiq edilməsi yerində və ya onlayn qiymətləndirilmə formatında həyata keçirilir. 

Bununla bağlı AQTA sözügedən yoxlamaların nəticələrini mütəmadi olaraq KİV vasitəsilə ictimaiyyətin diqqətinə çatdırır. 










Bizim.Media