"Google” xəritəni axtarış hissəsində Bakı şəhərinin küçə adlarını qeyd etdikdə ortaya ilginc, bəzən isə gülünc mənzərələr çıxır.
Sfera.az bildirir ki, Sovet dönəmində demək olar ki, Bakı küçələrinin əksəriyyətini, inqilabçıların, komunistlərin, Sovet hakimiyyətində təmsil olunan şəxslərin adları bəzəyirdi.
Hətta burada çoxluq erməni adlarından və sözlərindən ibarət idi. Hazırda bu adların çox hissəsi dəyişdirilsə də köhnə, anlamsız küçə adlarının qaldığı ərazilər də var. Məsələn (Keçid məhəllə”, "Vtorçermet - Yusifzadə”, "Rezervuar”, "İzlivnoy”, "Stroydetal”, "2-ci dəmiryol küçəsi”, "3-cü dəmiryol küçəsi”, "1-ci - 15 ci sıra küçələri”, "Vorovski”, "Xutor”, Yasamal rayonu ərazisindəki "7-ci Sallaqxana”, Nəsimi rayonunda yerləşən "22-ci dairə”, "Kərpic”, "7-ci Sverdlov”, "Todorski”, "Droqal” küçələri, Rezervuar küçəsi, İzlivnoy küçəsi, 2-ci Dağlıq küçəsi və.s) Bəzən isə qarşımıza elə küçə adları çıxır ki, ümumiyyətlə bu ad bizə heç nədən xəbər vermir.
Bizim.Media növbəti dəfə bu cür təşəbbüs ilə çıxış edir ki, bu cür mənasız və anlaşılmaz adlar öz etnik mənzərəsini saxlamaqla Vətən mühairbəsində həlak olanların, əsasən də Azərbaycanda yaşayan azsaylı xalqların şəhid nümayəndələrin adları ilə dəyişdirilsin.
Bu təkliflə Bakı şəhər İcra Hakimiyyətinə müraciət etdik. Qurumdan təklifimizi yüksək qiymətləndirərək bildirdilər ki, bu prosesin ətrafında müəyyən işlər gedir.
Bizim.Media-ya verilən məlumata görə, şəhid adının əbədiləşdirilməsi haqqında Prezidentin fərmanı, Nazirlər Kabinetinin sərəncamı var:
"Biz artıq şəhidlərin adına müəyyən sənədləri toplamışıq. Şəhidlərin adlarının əbədiləşdirilməsi üçün onların valideynləri bizim quruma müraciət ediblər. Hazırda bütün Bakının rayonları ərazilərində olan şəhidlərin adlarını toplayıb çıxış analiz edirik.
Bu işin icra olunması proseduruna gəldikdə isə Prezidentin fərmanı əsasında Nazirlə Kabineti qanun çıxarır, Bakı İcra Hakimiyyəti isə bu işi icra edir.
Bəs, azsaylı xalqların şəhid nümayəndələrinin gələcəkdə küçə və prospektlərə verilə bilərmi? Qurumdan bildirilib ki, əsasən regionlarda bu xalqların nümayəndələrinin adlarına bəzi küçələr var. Bakıda da bu həyata keçirilə bilər. Ancaq nəzərə alsaq ki, Bakı şəhərində düşündüyünüz kimi, o qədər də küçə yoxdur. Bundan başqa şəhid adı ilə adlandırılan küçə də onun adına layiq olmalıdır. Çünki 50-100 metrlik küçələrə şəhid adı vermək bir az yaxşı olmaz. Biz onların xatirəsinə ehtiramla yanaşırıq”.
