Zaqatalada bir yaşlı uşağın əli ətçəkən maşında QALDI 

Zaqatalanın Əliabad qəsəbəsində bir yaşlı uşağın əli ətçəkən maşında qalıb.  

Bu barədə Bizim.Media-nın yerli bürosuna Rayon Mərkəzi Xəstəxanasından məlumat verilib.

Qeyd edilib ki, Əliabad qəsəbə sakini, 1 yaşlı Ayxan Vəliyevin sağ əlinin ətçəkən maşında qalması faktı üzrə Təcili Tibbi Yardıma müraciət daxil olub. Dərhal həkim briqadası hadisə yerinə göndərilib.
Həkimlərin məsləhəti ilə körpənin əlini ətçəkən maşından çıxarmaq üçün Fövqaladə Hallar Nazirliyinin Şəki rayon Dövlət Yanğından Mühafizə Hissəsinin Xilasedicilərinə müraciət edilib.

İxtisaslı mütəxəssislər tərəfindən körpənin əli ətçəkən maşından çıxarılaraq həkimlərə təhvil verilib.

Daha sonra Ayxan Vəliyevin əli üzərində cərrahiyyə əməliyyatı aparılıb. Uşağın müayinə və müalicəsini davam etdirmək üçün Bakının ixtisaslı xəstəxanalarından birinə göndərilməsi qərara alınıb. Hadisənin təfərrüatları araşdırılır.

Tural Rasim oğlu, Bizim.Media, Şimal-Qərb bürosu