Azərbaycan Respublikası Təhsil Nazirliyi və Qafqaz Universitetinin birgə təşkilatçılığı ilə həyata keçirilən "Direktorların hazırlığı kursları -2016" layihəsi Bakı şəhəri ilə yanaşı regionlarda da keçirilməyə başlanılıb.
Moderator.az xəbər verir ki, bu təlimlərin məqsədi müasir idarəetmənin bilik və bacarığına yiyələnən, informasiya texnologiyalarına bələd, ölkəmizin təhsil və sosial inkişafına töhfə verə biləcək məktəb direktorlarını yetişdirmək və təkmilləşdirməkdir. Təlimlərdə Sumqayıt şəhəri, Abşeron və Xızı rayonları üzrə fəaliyyət göstərən ümumi təhsil müəssisələrində işləyən 40 təhsil işçisi iştirak edib. Təlimlərdə təhsil menecmentinin daha səmərəli təşkilini dəstəkləyən təhsildə keyfiyyətin idarəedilməsi, təhsili idarəetmənin hüquqi əsasları, kompüter və təlim texnologiyaları, təhsildə statistika və təhlil, təhsilin idarəedilməsi və monitorinqi, təhsili idarəetmənin psixoloji əsasları, təhsildə maliyyənin idarəolunması kimi fənlər tədris olunub.
Təhsil Nazirliyinin nümayəndələri və Qafqaz Universitetinin rektoru professor Ahmet Saniç kursun dinləyiciləri olan direktorlara sertifikatlar təqdim edib.
Qeyd edək ki, növbəti layihə 8 İyul ”“ 6 Avqust aralığında Gəncədə şəhərində keçiriləcək. Layihədə Gəncə şəhəri, Göygöl, Samux, Goranboy, Daşkəsən rayonlarından 41 nəfər iştirak edəcək .
Elmin Nuri
