FHN-in Dövlət Yanğın Nəzarəti Xidmətində “Heydər Əliyev İli”nə ilə bağlı tədbir keçirilib - FOTO

Fövqəladə Hallar Nazirliyinin (FHN) Dövlət Yanğın Nəzarəti Xidmətində Ümummilli lider Heydər Əliyevin anadan olmasının 100 illik yubileyinə həsr olunmuş tədbir keçirilib. 

Bu barədə Bizim.Media-ya FHN-in Mətbuat Xidmətindən məlumat verilib. 

Bildirilib ki, tədbirdə fövqəladə hallar nazirinin müavinləri general-leytenant Ragim Lətifov və Tapdıq Əmiraslanov, FHN-in Dövlət Yanğın Nəzarəti Xidmətinin rəisi daxili xidmət general-mayoru Hikmət Abbasov, Yeni Azərbaycan Partiyası Xətai rayon təşkilatının sədri Vüqar Rəhimzadə, Nazirliyin Aparatının nümayəndələri və Xidmətin əməkdaşları iştirak ediblər. 

Əvvəlcə Azərbaycan xalqının Ulu Öndəri Heydər Əliyevin büstü önünə gül dəstələri düzülüb, Ümummilli Liderin əziz xatirəsi dərin ehtiramla yad edilib. 

Sonra tədbir iştirakçıları Ulu Öndər Heydər Əliyevin həyat və fəaliyyətini əks etdirən fotostendə baxıb, FHN-in Dövlət Yanğın Nəzarəti Xidməti tərəfindən hazırlanan və Ümummilli Liderə həsr edilən “Fövqəladə Hallar Nazirliyinin Dövlət Yanğın Nəzarəti Xidməti” kitabı ilə tanış olublar. 

Tədbir Dövlət Himninin səsləndirilməsi ilə açıq elan edilib, Ümummilli Lider Heydər Əliyevin əziz xatirəsi bir dəqiqəlik sükutla yad olunub. 

Tədbirdə Dövlət Yanğın Nəzarəti Xidmətinin rəisi daxili xidmət general-mayoru Hikmət Abbasov çıxış edərək deyib ki, dövlətçilik salnaməmizdə silinməz izlər qoymuş, azərbaycanlı olması ilə ömür boyu fəxr etmiş, milli qürur və iftixar mənbəyimiz olan Heydər Əliyev bütün dünyada Azərbaycanın rəmzi kimi qəbul edilir.

Müstəqil Azərbaycan Ulu Öndərin indiki və gələcək nəsillərə əmanəti, onun zəngin və çoxşaxəli irsi isə xalqımızın milli sərvətidir. “Bu müqəddəs mirası qoruyub saxlamaq hər bir azərbaycanlının şərəfli vəzifəsidir”, - deyə sözünə davam edən Hikmət Abbasov Ulu Öndər Heydər Əliyevin ideya və əməllərini layiqincə davam etdirən Prezident, Müzəffər Ali Baş Komandan cənab İlham Əliyevin müdrik rəhbərliyi və Ordumuzun rəşadəti sayəsində 30 ilə yaxın müddətdə düşmən işğalında olan doğma Qarabağımızın əbədi azadlığına qovuşduğunu, azad olunmuş ərazilərimizdə böyük quruculuq işlərinin getdiyini, infrastruktur layihələrinin icra olunduğunu iftixar hissilə dilə gətirib. 

Yeni Azərbaycan Partiyası Xətai rayon təşkilatının sədri Vüqar Rəhimzadə Ulu Öndər Heydər Əliyevin xalqımızın xilaskarı kimi şərəfli ömür yolundan danışıb, müstəqil Azərbaycanın qazandığı uğurlardan geniş bəhs edib. 
“Fövqəladə Hallar Nazirliyinin Dövlət Yanğın Nəzarəti Xidməti” kitabının müəllifi, Xidmətin Yanğına qarşı təbliğat şöbəsinin böyük təlimatçısı Rövşən Bəkirov öz çıxışında Ulu Öndərin Azərbaycanın yanğın təhlükəsizliyi orqanlarının inkişafındakı rolundan danışıb. 

Tədbirin sonunda iştirakçılar Ulu Öndərin anadan olmasının 100 illik yubileyi münasibətilə hazırlanan “Əbədiyyətin ilk əsri. Heydər Əliyev 100” filminə baxıblar. 












Bizim.Media