Ulu Öndər Heydər Əliyevin 100 illik yubileyinə həsr olunmuş “Heydər babaya Qarabağdan məktub” adlı esse müsabiqəsi başa çatıb.
Bizim.Media-nin yerli bürosu xəbər verir ki, müsabiqə Qarabağ İqtisadi Rayonunda Azərbaycan Respublikası Prezidentinin Xüsusi Nümayəndəliyi, Qarabağ İqtisadi Rayonunda Bərpa, Tikinti və İdarəetmə Xidməti və Qarabağ Regional Təhsil İdarəsinin təşkilatçılığı ilə keçirilib.
Müsabiqənin yekun tədbiri Tərtər rayonunun işğaldan azad edilmiş Talış kəndində təşkil olunub.
Tədbirdə Qarabağ Regional Təhsil İdarəsini əhatə edən rayonların ümumtəhsil məktəblərinin ən yaxşı yazıların müəllifi olan 30-a yaxın şagirdi iştirak edib. Tədbirdə əvvəlcə Ümummilli Lider Heydər Əliyevin və ölkəmizin ərazi bütövlüyü uğrunda canından keçmiş şəhidlərin xatirəsi bir dəqiqəlik sükutla yad edilib.
Mərasimdə çıxış edən Qarabağ İqtisadi Rayonunda Azərbaycan Respublikası Prezidentinin Xüsusi Nümayəndəsinin müavini Bəşir Hacıyev bildirib ki, Ümummilli Lider Heydər Əliyev hər bir Azərbaycan övladının güclü təhsilinə önəm verirdi.
Əsrlər keçsə belə Ulu Öndər qəlbimizdə Azərbaycan naminə gördüyü bütün xoş əməllərlə yaşayacaq. Tədbirin sonunda esse müsabiqəsinin qaliblərinə Fəxri Fərman və qiymətli hədiyyələr təqdim olunub.
Elgün Gəncimsoy, Bizim.Media, Qarabağ bürosu
