Balakən şəhərini çirkləndirənlər cəzalandırıldı – FOTO  

Rayon ərazisində ətraf mühiti çirkləndirən və qanunsuz küçə ticarəti ilə məşğul olan şəxslərin müəyyən olunması, onların maarifləndirilməsi məqsədilə nəzarət-profilaktik tədbirlər keçirilib. 

Bizim.Media-nın yerli bürosu bildirir ki, rayon icra hakimiyyəti və polis şöbəsinin keçirdiyi birgə tədbirlər nəticəsində səkilərdə piyadaların hərəkətini çətinləşdirən, natəmizlik yaradaraq pərakəndə ticarətlə məşğul olan satıcılar aşkarlanıb.

Polis əməkdaşları həmin şəxslərlə maarifləndirici söhbətlər apararaq yalnız müəyyən edilən yerlərdə bu fəaliyyətlə məşğul olmalarının vacibliyini onların diqqətinə çatdırıb. 

Həmçinin, ətraf mühitin çirkləndirilməsinin qarşısının alınması, sanitar-gigiyenik normalara riayət edilməsinin təmini məqsədilə aparılan yoxlamalar zamanı isə məişət tullantılarını urnalardan kənara ataraq ərazidə antisanitar vəziyyət yaradan şəxslər müəyyən olunub.

Onlarla profilaktik söhbət aparılıb və barələrində inzibati tənbeh tədbiri görülüb. 

Belə tədbirlərin rayonun kənd və qəsəbələrində də keçirilməsi nəzərdə tutulur.  

Tural Rasim oğlu, Bizim.Media, Şimal-Qərb bürosu