Əmək və Əhalinin Sosial Müdafiəsi Nazirliyi tərəfindən ms.sosial.gov.az portalı üzərindən onlayn satışı həyata keçirilən mənzillərdən artıq bir qisminin onları ilk bron etmiş şəxslərə satışı həyata keçirilib.
Nazirlikdən Bizim.Media-ya verilən xəbərə görə, Bakının Ramana qəsəbəsindəki yeni yaşayış kompleksində yerləşən mənzilləri bron etmiş şəxslərdən bir qrupu ilə seçdikləri mənzilin dəyəri tam ödənilməklə notariat qaydasında təsdiq edilmiş alqı-satqı müqaviləsi bağlanıb.
Bundan sonra həmin mənzillər sahiblərinə təqdim edilib.
Hazırda ms.sosial.gov.az portalı üzərindən mənzillərin bron edilməsi, həmçinin mənzili bron etmiş şəxslərlə əlaqə saxlanılaraq onların bron etdikləri mənzillərin alqı-satqısına dəvət edilməsi prosesi davam edir.
Xatırladaq ki, satışa çıxarılan 1662 mənzil paytaxtın Sabunçu rayonunun Ramana və Kürdəxanı qəsəbələrində, Qaradağ rayonunun Ümid qəsəbəsində, habelə Abşeron və Samux rayonlarındakı yeni yaşayış binalarında yerləşir.
Hər biri çıxarışlı və tam təmirli olan mənzillər istifadə olunmayıb və onları banklara müraciət etməklə ipoteka krediti ilə də almaq olar.
Mənzillərin portal üzərindən satışı bu il iyulun 1-dək davam edəcək.
Bizim.Media
