Naxçıvanın Baş naziri Türkiyənin Muxtar Respublikadakı baş konsulu ilə görüşdü

Yanvarın 31-də Naxçıvan Muxtar Respublikasının Baş naziri Səbuhi Məmmədovla Türkiyə Respublikasının Naxçıvanda yeni təyin olunmuş baş konsulu Asip Kaya arasında görüş keçirilib. 

Bizim.Media xəbər verir ki, bu barədə Naxçıvan Muxtar Respublikası Nazirlər Kabinetinin mətbuat xidmətinin məlumatında qeyd edilib. 

Bildirilib ki, Baş nazir Asip Kayanı yeni vəzifə təyinatı münasibətilə təbrik edib, ona Naxçıvandakı diplomatik fəaliyyətində uğurlar arzulayıb.

Səbuhi Məmmədov Azərbaycan ilə Türkiyə arasında yeganə quru sərhəd bölgəsi olan Naxçıvanda Türkiyə Respublikasının Baş Konsulluğunun fəaliyyətinin mühüm əhəmiyyət kəsb etdiyini diqqətə çatdırıb. 

Görüşdə ölkələrimiz arasında strateji müttəfiqlik səviyyəsinə yüksələn münasibətlərin tərkib hissəsi kimi Naxçıvan Muxtar Respublikası ilə Türkiyə arasında ticarət əlaqələrinin genişləndirilməsi, enerji mübadiləsi, gömrük-keçid prosedurlarının sadələşdirilməsi, o cümlədən İqdır-Naxçıvan qaz boru kəməri və Naxçıvan-Qars dəmiryolu xətti kimi strateji layihələrin reallaşdırılmasının vacibliyi qeyd olunub. 
Baş konsul Asip Kaya səmimi qəbula görə minnətdarlığını bildirib, Tehran şəhərində Azərbaycan Respublikasının Səfirliyinə qarşı törədilmiş terror aktı nəticəsində şəhid olmuş səfirlik əməkdaşına görə başsağlığı verib. 

Naxçıvana baş konsul vəzifəsinə təyinatından məmnunluğunu ifadə edən Asip Kaya, fəaliyyəti dövründə iqtisadi, ticarət, humanitar və digər sahələrdə əlaqələrin daha da inkişaf etdirilməsində səylərini əsirgəməyəcəyini bildirib. 

Görüş zamanı qarşılıqlı maraq doğuran bir sıra məsələlər ətrafında fikir mübadiləsi aparılıb. 


Bizim.Media