Milli Məclis niyə bütün qanun layihələrini ictimai müzakirəyə çıxartmır? - AÇIQLAMA

"Milli Məclisin komitə və komissiyaları az qala hər gün açıqlama verirlər ki, hansısa bir qanun layihəsi müzakirə edilib və plenar iclasa tövsiyə edilib". 

Bizim.Media xəbər verir ki, bunu Azərbaycan İnternet Forumunun Prezidenti Osman Gündüz sosial şəbəkə hesabında yazıb.  

O, bəzi qanun layihələrini tapmağın çətin məsələ olduğunu qeyd edib: 

"Maraqlıdır ki, bu qanun layihələrinin bəzilərini tapmaq ciddi müşkülə çevrilir. Mövcud normalar tələb edir ki, bu tip layihələr dərhal ictimai müzakirəyə çıxarılmalı və müzakirə üçün də imkanlar yaradılmalıdır. Amma aidiyyəti dövlət qurumu və Milli Məclis bu məsələlərə laqeyd yanaşır. 
Milli Məclisin saytında “Qanun layihələri” bölməsi və ictimai müzakirə imkanı yaradılsa da, diqqət yetirdikdə görmək olar ki, cəmi bir neçə qanun layihəsi müzakirə üçün yerləşdirilib. Müzakirəsi gedən, müzakirəyə təqdim edilən bir çox layihələr isə yoxdur".

Milli Məclisin Mətbuat və İctimaiyyətlə əlaqələr şöbəsinin müdiri Mehman Qaibov isə Bizim.Media-ya açıqlamasında hər şeyin qanunla tənzimləndiyini deyib:

“Daha ətraflı sorğunuza yazılı şəkildə məlumat verəcəyik”.

Surxay Atakişiyev, Bizim.Media