Xəbər verildiyi kimi bu gün hüquq mühafizə orqanları tərəfindən saxlanılan “Baku Steel Company” şirkətinin rəhbəri Rasim Məmmədovla bağlı məhkəmə iclası keçiriləcək. Rasim Məmmədovun işinə Səbail Rayon Məhkəməsində baxılacaq. Məhkəmənin keçiriləcəyi saat hələki açıqlanmayıb.
R.Məmmədov barəsində Cinayət Məcəlləsinin 308.2-ci (Vəzifə səlahiyyətlərindən sui-istifadə), 178.4-cü (Dələduzluq, külli miqdarda ziyan vurmaqla törədildikdə) və 179.4-cü (Mənimsəmə, külli miqdarda ziyan vurmaqla törədildikdə) maddələri üzrə ittiham irəli sürülüb.
Bizim.Media-ya danışan Rasim Məmmədovun vəkili Elçin Sadıqov ilkin olaraq müvəkkilinin müdafiə hüququnun tanınmasının vacibliyini qeyd edib:
“Şəxsin hər hansı cinayətlər törətməsi ilə bağlı dəlillər yoxdursa, təqsirləndirilən maddələrin ağırlıq dərəcəsindən asılı olmayaraq ittiham oluna bilməz. Rasim Məmmədova rəsmi ittham irəli sürülməyib, sadəcə şübhə edilən şəxsdir. İttiham irəli sürüləndən sonra biz də öz arqumentlərimizi irəli sürəcəyik”.
MÖVZU İLƏ BAĞLI:
“Baku Steel Company” MMC-nin sahibi Rasim Məmmədov həbs olunub
“Minlərlə ailəni çörəksiz qoyan Rasim Məmmədovun cəzasını alacağını hamı bilirdi” – Qalmaqallı zavodun səhmdarı
Vəkillər Kollegiyasının üzvü Əsabəli Mustafayevin sözlərinə görə R. Məmmədov həddindən artıq ağırlaşdırıcı maddələrlə təqsirləndirilir və 10-12 il azadlıqdan məhrumetmə cəzası göstərir:
“Təbii ki, barəsində veriləcək qərar məhkəmənin verəcəyi qiymət əsasında müəyyənləşəcək. Məhkəmənin nə qədər ədalətli olacağını bu işlə məşğul olan vəkillər deyə bilər. Amma məhkəmə praktikasında bu maddələrlə həbs qəti imkan tədbiri seçilir.
Ola bilsin ki, R.Məmmədov zərərin ödənilməsini öz üzərinə götürsün. Bu, yüngülləşdirici hal ola bilər. Məhkəmə həm azadlıqda, həm də dustaqda olduğu müddətdə zərərin ödənilməsi imkanını ona verə bilər. Hər halda hər şey məhkəmənin səalhiyyətlərindən asılıdır”.
Alçina Amilqızı, Bizim.Media
