“Tələbələrə nəqliyyatda güzəştli kartlar verilsin” – Parlamentdə TƏKLİF  

“Məlum olduğu kimi Sumqayıtda yaşayan məşğul əhalinin əksəriyyəti Bakıda çalışır. Lakin Bakı-Sumqayıt yolundakı tıxaclar səbəbindən vətəndaşlar zamanının çoxunu yolda keçirir”.

Bizim.Media xəbər verir ki, bu fikirləri deputat Emin Hacıyev Milli Məclisin bu gün keçirilən plenar iclasında səsləndirib.  

“Düşünmürəm ki, tıxacların əsas səbəbi maşınların çox olmasıdır. Çünki Azərbaycan adambaşına düşən avtomobil sayına görə heç də dünya üzrə ön sıralarda deyil. Təklif edirəm ki, Abşeron ərazisində nəqliyyata vahid sistem tətbiq edilsin.

Məsələn, Sumqayıtdan Bakıya xəttlər yalnız "avtovağzaldan-avtovağzala" prinsipi ilə olmasın. Bakının müxtəlif yerlərinə, məsələn Bakı Dövlət və İqtisad Universitetlərinə marşrutlar açıla bilər. Eyni zamanda güzəştli kartlar tətbiq edilə, bundan xüsusən tələbələr istifadə edə bilər”, - deyə deputat əlavə edib.

Murad Əhmədov, Bizim.Media