Lənkəran rayon İcra Hakimiyyətinin başçısının sabiq müavini Rasilə Arifqızının cinayət işi hakim icraatına verilib.
Bizim.Media-nın məlumatına görə, cinayət işi araşdırılması üçün Lənkəran rayon Məhkəməsinin hakimi Rəşad Məmmədovun icraatına verilib.
Məhkəmənin hazırlıq iclasının vaxtı hələlik açıqlanmayıb.
MÖVZU İLƏ BAĞLI:
Lənkəran icra başçısı müavininin məktəblini döydüyü təsdiqləndi - Cinayət işi açıldı
Qeyd edək ki, Lənkəran rayon İcra Hakimiyyətinin başçısının sabiq müavini Rasilə Arifqızının tərəfindən Lənkəran şəhər V.Əliyev adına 4 nömrəli humanitar təmayüllü məktəb-liseyin 9-cu sinif şagirdinə qarşı fiziki zorakılıq hərəkətlərinin edilməsi faktı ilə bağlı Lənkəran rayon Prokurorluğunda cinayət işi başlanıb.
İstintaqla müəyyən olunub ki, R.Arifqızı 2022-ci il iyulun 14-də attestat verilməsi bəhanəsi ilə xidməti sürücüsü vasitəsilə şagirdi yaşadığı evə gətizdirib.
O, həmçinin vəzifəli şəxs kimi xidməti səlahiyyətlərinin hüdudlarından açıq-aşkar surətdə kənara çıxaraq yeniyetmənin mobil telefonunu əlindən alıb.
R.Arifqızı şəxsi məlumatlarını yaxın qohumlarının mobil telefonlarına göndərməklə sonuncunun hüquqlarına və qanuni mənafelərinə mühüm zərər vurub, həmçinin ona bədən xəsarətləri yetirib.
Toplanmış sübutlar əsasında Rasilə Arifqızına Cinayət Məcəlləsinin 309.1-ci (vəzifə səlahiyyətlərini aşma) maddəsi ilə ittiham elan edilib.
Eldar Məmmədli, Bizim.Media
