Su çatışmazlığının həlli yolları - Rəy

Yeni su anblarının yaradılması suyun ilin soyuq dövründə də anbarlarda toplanması üçün zəruridir. Lakin qarşıdakı 2-3 il ərzində su çatışmazlığını nəzərə alaraq Kənd Təsürrüfatı Nazirliyi sudan istifadə zamanı yeni suvarılan sahələrin istifadəyə verilməsini məhdudlaşdırmalı, mövcud sahələrin su ilə optimal təmin olunmasına üstünlük verilməlidir.

Bizim.Media "Trend"ə istinadən xəbər verir ki, bunu AMEA akademik H.Ə.Əliyev adına Coğrafiya İnstitutunun şöbə müdiri, coğrafiya üzrə fəlsəfə doktoru, dosent Mirnuh İsmayılov “Yengicə su anbarının reqional ekoloji durumunun nəzəri olaraq texniki əsaslandırılması” mövzusunda keçirilən onlayn iclasda iştirak edərkən deyib.

Onun sözlərinə görə, Yengicə su anbarını inşa edərkən bir neçə məsələni diqqət mərkəzində saxlamaq vacibdir. O deyib ki, işğaldan azad olunmuş ərazilərdə kənd təsərüfatının inkişafı üçün külli miqdarda su ehtiyatları tələb olunur.

Yengicə su anbarının Vəndam çayının davamı və Kür çayını su ilə təmin edən qollardan biri olan Göyçaya tökülən Qaraçay üzərində tikildiyini diqqətə çatdıran alim su anbarının tikilməsi ilə əlaqədar Göyçayda suyun azalmasının nəticə etibarı ilə Kürün suyun azalmasına səbəb olacağını bildirib.

M.İsmayılov Azərbaycanda Kür çayı boyunca uzanan əsas əkinçilik zonalarının suvarılmasında problemlərin yaranmaması, su çatışmazlığından çəkilən əziyyətlərin qarşıdakı illərdə də təkrarlanmaması üçün Kür çayında axımın az da olsa, formalaşmasının olduqca vacib olduğunu söyləyib:

"Yengicə su anbarının tikildiyi ərazi Qanıx-Əyriçay vadisinə düşür ki, bu vadi yeraltı sularla olduqca zəngindir. Çalışmaq lazımdır ki, həmin yeraltı suları kənd təsərrfatı dövriyyəsinə qoşaraq suvarmada istifadə etmək olsun".

"Bu kimi məsələlər yeni su anbarlarının inşasında nəzərə alınmalıdır” deyə şöbə müdiri fikrini tamamlayıb.

Bizim.Media