Son günlər havanın yağmurlu keçməsi, dağ massivinə qar yağmağı Qarqar çayına sel sularının gəlməyinə səbəb olub.
Bizim.Media-nın Qarabağ bürosu xəbər verir ki, çay yatağında sel sularının artma ehtimalı Ağdam və Ağcabədinin bəzi kəndlərinin əkin sahələrində sel təhlükəsi riskini artıra, təkcə Ağdam rayonunun Əfətli və Evoğlu kəndlərinin 1400 hektara qədər əkin sahəsini dağıda bilər.
Kənd sakinlərinin sözlərinə görə, suyun qarşısını almaq üçün artıq bəndlər uçurulub. Beləliklə də Qarqar çayında məcrasından çıxan su yenidən Qarqar çayına yönləndirilir.
Kənd sakinləri onu da qeyd edib ki, sel sularının işğaldan azad olan ərazilərdən partlamamış hərbi sursatları da gətirmə ehtimalı var.
Minaların gəlmə ehtimalı isə yerli sakinlərlə yanaşı çay yataqlarında fəaliyyət göstərən daş karxanalarında çalışan fəhlə və sürücülər üçün həyati təhlükə yarada bilər.
Elgün Gəncimsoy, Bizim.Media
