Elmar Qasımov Antalyada bürünc medal uğrunda görüşə çıxacaq

Azərbaycan cüdoçusu Elmar Qasımov Türkiyənin Antalya şəhərində keçirilən Böyük Dəbilqədə bürünc medal uğrunda görüşə çıxacaq.

Bizim.Media xəbər verir ki, 100 kq çəki dərəcəsində çıxış edən idmançı 1/32 final mərhələsində Qriqori Minaskini (Estoniya), daha sonra Marko Kumriç (Xorvatiya) və Şadi Elnahası (Kanada) məğlub edib.

1/4 finalda Nikoloz Şerazadişviliyə (İspaniya) uduzan 32 yaşlı cüdoçu təsəlliverici görüşdə Asley Qonzalezə (Rumıniya) qalib gəlib.

Eyni çəkidəki Zelim Kotsoyev 1/16 finalda Mert Şişmanları (Türkiyə) yensə də, Kayl Reyeslə (Kanada) dueldən məğlub ayrılıb.

90 kq-da yer alan Rüfət İsmayılov 1/32 finalda Qeorqi Qramatikovu (Bolqaristan) mübarizədən kənarlaşdırsa da, Komronşox Ustopiriyonla (Tacikistan) bacarmayıb.

100 kq-dan yuxarı çəkidəki Uşangi Kokauri 1/16 finalda Lorenzo Aqro Silvayna (İtaliya), növbəti raundda Sven Heynleyə (Almaniya) qalib gəlsə də, Alişer Yusupova (Özbəkistan) uduzub. Kokauri təsəlliverici görüşdə Temur Rakhimovu məğlub edə bilməyib.

Eyni çəkidəki İmran Yusifov 1/16 finaldakı ilk qarşılaşmasında Marius Fizelə (Slovakiya) yenilib.

Qeyd edək ki, əvvəlki yarış günlərində tatamiyə çıxmış Azərbaycanın 12 cüdoçusu medal qazana bilməyib.

Bizim.Media