"Bu ilin 10 ayı ərzində Sumqayıt Şəhər Polis İdarəsinin əməkdaşları tərəfindən həyata keçirilən əməliyyatlar zamanı 30 kiloqrama yaxın müxtəlif xassəli narkotik vasitə və psixotrop maddə, habelə 430 ədəd satışı qadağan olunan metadon həbi qanunsuz dövriyyədən çıxarılıb.
Qeyd edilən dövr ərzində Sumqayıt şəhərində narkotik vasitələrlə bağlı 171-i satış olmaqla 353 fakt aşkar edilib və ümumilikdə bu qanunsuz fəaliyyətlə məşğul olan 425 nəfər məsuliyyətə cəlb edilib".
Bizim.Media Daxili İşlər Nazirliyinə istinadən xəbər verir ki, bu fikirləri Sumqayıt Şəhər Polis İdarəsinin rəisi, polis polkovniki Fəqan Azadəliyev şəhər ərazisində yerləşən 11 saylı tam orta məktəbdə narkomaniyanın fəsadlarından bəhs edən maarfiləndirmə tədbirində çıxışı zamanı deyib.
MÖVZU İLƏ BAĞLI:
DTX və polis əməliyyat keçirdi - saxlanılan var
Bildirib ki, karantin qaydaları nəzərə alınmaqla keçirilən tədbirdə “Narkomaniyaya yox deyək” mövzusunda çıxış edən şəxslər narkotik vasitələrin insanlar üçün yaratdığı problemlərdən danışıb və narkomaniyanın bir nəfərin yox ümumiyyətlə cəmiyyətin bəlası olduğunu qeyd ediblər:
"Son aylarda Daxili İşlər Nazirliyinin narkotik vasitələrə qarşı ölkəboyu həyata keçirdiyi genişmiqyaslı əməliyyatlar barədə məktəbin 9, 10 və 11-ci sinif şagirdləri məlumatlandırılıb, onlara sağlam gələcək naminə narkotik vasitələrdən uzaq durmaq tövsiyyə edilib".
Çıxışlar zamanı gənclərə daima diqqətli olmalarının, narkotik vasitələrin qanunsuz dövriyyəsi ilə məşğul olan şəxslər haqqında məlumat əldə etdikdə bu barədə valideynlərinə, müəllimlərinə, polisə, habelə Nazirliyin sosial şəbəkələrdəki rəsmi hesablarına məlumat vermələrinin vacib olduğu qeyd edilib.
Tədbirin sonunda məktəbliləri maraqlandıran suallar cavablandırılıb və narkomaniyanın fəsadlarından bəhs edən sosial çarxlar nümayiş etdirilib.
"Sumqayıt şəhərində yerləşən təhsil müəssisələrində “Narkomaniyaya yox deyək” və “İnsan alverinə qarşı mübarizə” mövzusundə maarifləndirmə tədbirləri bundan sonra da davam etdiriləcək", - nazirlikdən bildirilib.
Bizim.Media
