Rumıniyanın baş naziri Marçel Çolaku Paris-2024 Yay Olimpiya Oyunlarının bağlanış mərasimini boykot edəcək.
Bizim.Media xəbər verir ki, o, mərasimdə iştirak etməyəcəyini bildirib.
Buna səbəb idman gimnastikası yarışlarında rumıniyalı idmançının üzləşdiyi hadisədir. Baş nazirin fikrincə, Ana Barbosu hakim haqsızlığı üzündən bürünc medaldan məhrum edilib:
"Gimnastikadakı qalmaqaldan sonra Parisə bağlanış mərasiminə getməyəcəm. Rumıniyalı idmançı ilə yaxşı davranmadılar. Gimnastımız əməyi sayəsində qazandığı layiqli medaldan məhrum edildi. Bu, qəbulolunmazdır".
Qeyd edək ki, hakimlər sərbəst hərəkətlərlə çıxış zamanı amerikalı Cordan Çaylza verilən xalda dəyişiklik edərək, onun 5-ci pillədən 3-cü pilləyə yüksəlməsinə şərait yaradıblar. Nəticədə Rumıniya idmançısı fəxri kürsüdən kənarda qalıb.
Rəşad Rafiqoğlu, Bizim.Media
