Artıq bir neçə gündür ki, Xaçmazın Qudyalçay körpüsünün yaxınlığında çəkilən müvəqqəti alternativ yol sürücülərin istifadəsinə verilib.
Bizim.Media-nın şimal bürosu xəbər verir ki, indi nəqliyyat vasitələri Xudat-Rusiya sərhədi və Xaçmaz-Bakı istiqamətinə uçan körpünün yanından yeni salınmış yoldan keçməklə hərəkət edirlər.
Müşahidələrimiz zamanı alternativ yoldan sürücülərin rahatlıqla keçdiklərini gördük. Onlar körpü uçandan sonra Qımılqışlaq kəndi istiqamətindən alternativ kimi təklif edilən 6 km çınqıllı yolla müqayisədə, bu yolun çox sərfəli olduğunu deyirlər.
Müşahidələrimiz zamanı iri tonnajlı yük maşınlarının da bu yoldan istifadə etdikləri diqqətimizdən yayınmadı.
Xaçmaz rayon İcra Hakimiyyətindən sorğumuza cavab olaraq bildirilib ki, alternativ yolun yük maşınlarının keçməsi səbəbindən çökməsi mümkün deyil. Bunu baxmayaraq, qarşıdakı həftənin ilk günündən yük avtomobillərinin keçidinə məhdudiyyət qoyulacağı barədə qərar verəcəyik.
Hələliksə, yeni inşa edilən körpünün inşası sürətlə davam edir.
Aytəkin Alxaslı, Bizim.Media, Şimal bürosu
