\"Orta-ixtisas pilləsi anlayışı dünyanın heç bir ölkəsində yoxdur\" – Nazir müavini 

"Bizim qanunvericilikdə olan orta-ixtisas pilləsi anlayışı dünyanın heç bir ölkəsində yoxdur". 

Bizim.Media xəbər verir ki, bunu elm və təhsil nazirinin müavini İdris İsayev “Azərbaycanda təhsil sisteminin dayanıqlığının gücləndirilməsi və AzMKÇ 5-ci səviyyə kvalifikasiyalarının təkmilləşdirilməsi üçün Elm və Təhsil Nazirliyinə dəstək” adlı texniki yardım layihəsinin açılış konfransında bildirib. 

Onun sözlərinə görə, Avropa kvalifikasiyaları çərçivəsində orta ixtisas təhsili ya natamam ali, ya da qısamüddətli ali təhsil adlanır:  

"Təbii ki, biz bu faktorları nəzərə almalıyıq. Çünki bu çərçivəni qəbul ediriksə, ilk növbədə kvalifikasiyaların tanınmasına şərait yaratmalıyıq. Eyni zamanda kvalifikasiyalar üzrə təhsil səviyyələrinin düzgün müəyyənləşdirilməsinə müsbət təsir üçün yanaşmamızı dəqiqləşdirməliyik". 

Nazir müavini əlavə olaraq deyib ki, Milli Məclisdə müzakirə edilən "Ali təhsil haqqında" qanundakı maddələrin birində ali təhsilə aid edilən kvalifikasiyalar maddəsi var:  

"Biz həmin maddədə 5-ci səviyyəni ali təhsilə aid edilən kvalifikasiya səviyyəsi kimi müəyyən etmişik. Dünyada da qəbul edilən bir yanaşmadır. Düşünürəm ki, qanun qəbul ediləcəyi halda orta ixtisas təhsil pilləsi ali təhsilin pilləsi kimi sayılmayacaq", - deyə İ.İsayev qeyd edib. 

Səkinə Yusibli, Bizim.Media