Bir neçə rayonda icra başçısı postunu tutmuş MƏMURLAR – SİYAHI

Ölkəmizdə fəaliyyəti ən çox tənqid olunan idarəetmə institutları, yəqin ki, icra hakimiyyətləridir. Aparılan sosial sorğular da insanların bu təsisatlara inamının aşağı olduğunu sübuta yetirir. Xüsusən də, son illər ərzində qanunsuz əməlləri ucbatından xeyli sayda icra başçısının xidməti otağının həbsxana kamerasıyla əvəzlənməsi onlara qarşı tənqidlərin artmasına səbəb olub.

Azərbaycanda bəzi icra hakimiyyəti rəhbərləri də var ki, uzun illərdir bu vəzifəni icra edirlər. Onların əksəriyyətinin işlədikləri rayonlar dəyişsə də, vəzifələri eyni qalıb.

Bizim.Media bir neçə rayonda icra başçısı olmuş məmurları araşdırıb.

Adil Məmmədov – Onun icra başçısı kimi 28 illik stajı var. A. Məmmədov 2011-ci ilin aprelindən Qobustanın icra başçısıdır. O, 1994-2002-ci illərdə Oğuz, 2002-2004-cü illərdə Qəbələ, 2004-2011-ci illərdə Biləsuvar rayonlarına rəhbərlik edib.

Taleh Qaraşov – 26 ildir ki, müxtəlif rayonlara rəhbərlik edir. 2012-ci ildən bəri Lənkəranın icra başçısı olan Qaraşov 1996-2002-ci illərdə Kürdəmir, 2002-2006-cı illərdə Cəlilabad, 2006-2011-ci illərdə Neftçala, sonrakı bir ildə isə Astaranın icra başçısı vəzifəsini icra edib.

Abdin Fərzəliyev – 2022-ci ili yanvarından etibarən Abşeron rayonunun icra başçısıdır. Daha əvvəl isə o, 2003-2005-ci illərdə Nizami, 2005-2022-ci illərdə isə Nərimanov rayonunda eyni vəzifədə olub.

Novruz Novruzov – 1995-ci ildən bu günə qədər 4 fərqli rayona başçılıq edib. O, 1995-2002-ci illərdə Lerik, 2002-2007-ci illərdə Goranboy, 2007-2019-cu illərdə Şabran, 2019-cu ildən etibarənsə Siyəzən rayonun icra başçısı kimi çalışıb.

Tofiq İbrahimov – İcra başçısı kimi 18 illik stajı olan T.İbrahimov 2004-2010-cu illərdə Qəbələ, 2010-12-ci illərdə Lənkəran rayonlarına başçılıq edib. 2012-ci ildən etibarən Ağdaş rayonunun icra başçısı vəzifəsindədir.

Rövşən Bağırov – 2007-2021-ci illərdə Lerikin icra hakimi olub. 2021-ci ilin aprelindən etibarən Ağsu rayonuna rəhbərlik edir.

Eldar Əzizov – 2000-ci ildən bəri 5 rayon və şəhərdə icra başçısı kimi çalışıb. E.Əzizov 2000-2003-cü illərdə Nizami, 2003-2011-ci illərdə Gəncə, 2011-2015-ci illərdə Sumqayıt, 2015-2018-ci illərdə Səbailin icra başçısı olub. O, 2018-ci ilin noyabrından etibarən Bakı Şəhər İcra Hakimiyyətinə rəhbərlik edir.

Qəzənfər Ağayev – İcra başçısı kimi 16 ildir çalışır. 2006-ci ildə bir neçə ay müddətinə Yardımlıda, 2006-2012-ci illərdə isə Masallı rayonunda icra hakimiyyətinə başçılıq edib. Həmin vaxtdan bu günə kimi Astaranın icra başçısıdır.

Vidadi İsayev – 2011-ci ildən Bərdə rayonunun icra başçısı olan V. İsayevin icra başçılıq təcrübəsi isə 17 ildir. O daha əvvəl 2005-2011-ci illərdə Tərtərə rəhbərlik edib.

Xəzər Aslanov – 2012-ci ildə Xızı rayonunun icra başçısıdır. O, daha əvvəl 2006-12-ci illərdə Yardımlı rayonunda eyni vəzifəni tutub.

Alı Qocayev – 10 ildir ki, Samux rayonuna rəhbərlik edir. Daha əvvəl isə 7 il müddətində (2005-2012-ci illərdə) Binəqədinin icra hakimi olub.

Elxan Usubov – 2011-ci ildən Şəkinin icra başçısı olan Usubov, bundan əvvəlki 4 il ərzində Ağstafa rayonuna rəhbərlik edib.

Mübariz Əhmədzadə - 2009-cu ilin sentyabrından etibarən Zaqatala rayonunun icra başçısıdır. O, 2007-2009-cu illərdə Qaxda eyni vəzifəni icra edib.

Mərdan Camalov – 2005-2019-cu illərdə Şirvan şəhərinin icra başçısı olub. 2019-cu ilin noyabrından bəri isə Zərdab Rayon İcra Hakimiyyətinin başçısıdır.

Süleyman Mikayılov – Bakının Qaradağ rayonuna 2010-cu ildən bəri rəhbərlik edir. Daha əvvəl 2005-ci ildə Yardımlı, 2005-2010-cu illərdə isə Lənkəran rayonunda eyni vəzifədə çalışıb.

Asif Əsgərov – 2015-ci ildən bəri Nəsimi rayonunun icra başçısıdır. O, 2006-2009-cu illərdə Zaqatala, 2009-2015-ci illərdə isə Səbail rayonunda icra hakimiyyətinə rəhbərlik edib.

Əziz Əzizov – 2006-2018-ci illərdə Cəlilabad rayonuna, 2018-19-cu illərdə isə Yasamal rayonuna rəhbərlik edib. Həmin ilin noyabrından bəri isə Suraxanının icra başçısıdır.

Murad Əhmədov, Bizim.Media