Mart ayının ilk günlərindən başlayaraq Şimal-Qərb bölgəsində davam edən qeyri-sabit hava şəraiti hələ də davam edir.
Bizim.Media-nın yerli bürosu xəbər verir ki, son bir neçə ildə bölgə rayonlarında mart ayında qarın yağması hallarına təsadüf edilməyib.
Bu il isə mart ayı gələndən artıq ikinci dəfədir ki, bölgənin yüksək dağlıq ərazilərinə qar yağır.
Verilən məlumatlara əsasən, Zaqatala və Qaxda qarın qalınlığı 2-3 sm təşkil etdiyi halda Şəkinin dağlıq ərazilərində 10-12 sm-ə çatır. Oğuz rayonunun yüksək dağlıq yaşayış məntəqələrində də qar müşahidə olunsa da, yollarda hərəkətə heç bir maneə yaratmayıb.
Bölgə rayonlarından keçən avtomobil və magistral yollarında qarın təsiri olmadığından nəqliyyatın hərəkəti öz axarında davam edir.
Mütəxəssislər bildirir ki, bu qarın yağması ilk növbədə bitçikilik məhsullarına, meyvə ağaclarına müsbət təsiri var.
Tural Rasimoğlu, Bizim.Media, Şimal-Qərb bürosu
