“Ötən gün axşam saatlarında paytaxtın Ceyhun Hacıbəyli və Mirəsədulla Mirqasımov küçələrinin kəsişməsində yol-nəqliyyat hadisəsi baş verib. Bu zaman yolun hərəkəti hissəsindən keçən piyada qəzadan son anda xilas ola bilib. Hadisə zamanı kəsişmədə olan piyada işıqforu isə yararsız vəziyyətə düşüb”.
Bizim.Media xəbər verir ki, bu barədə Daxili İşlər Nazirliyi Nəqliyyatı İntellektual İdarəetmə Mərkəzinin sürücülərə müraciətində deyilir.
Məlumata görə, digər bir yol-nəqliyyat hadisəsi Binəqədi şosesi ilə Mehdiabad yolunun kəsişməsində qeydə alınıb. Bu qəza nəticəsində nəqliyyat işıqforu sıradan çıxıb.
"Təəssüflər olsun ki, bəzi sürücülərin qaydalara məhəl qoymaması, yüksək sürətlə nəqliyyat vasitəsini idarə etməsi və digər qayda pozuntularına yol vermələri səbəbindən qəzalar baş verir ki, bu səbəbdən də işıqforlar yararsız hala düşür və onların idarəetmə qurğusu zərər görür.
Yararsız vəziyyətə düşən işıqforların yenisi ilə əvəz edilməsinin bir neçə gün çəkdiyini nəzərə alsaq, təbii ki, bu problemdən sürücü və piyadalar özləri əziyyət çəkirlər. Buna görə də bir daha xahiş edirik ki, sürücülər, xüsusilə də yolayrıclarına daxil olduqda sürət həddinə və işıqforun tələblərinə ciddi riayət etsinlər", məlumatda deyilir.
Bizim.Media
