Bərdə rayonunun Qaradəmirçi kəndində fəaliyyət göstərən Laçın rayonu, Aşağı Fərəcan kənd orta məktəbinin bağlandığı bildirilir. Bu iddia ilə məktəbin işçiləri çıxış edib.
Bizim.Media xəbər verir ki, mövzu ilə bağlı kənd sakini Yasəmən Ələkbərova deyib ki, məktəbdə ailə üzvləri ilə birgə çalışıb.
Ənənəvi olaraq sentyabr ayında işə başlamaq üçün gəlsələr də direktor bu il məktəbin fəaliyyət göstərməyəcəyini bildirib.
1995-ci ildən fəaliyyət göstərən təhsil müəssisəsi üçün 20 il öncə qeyri - hökümət təşkilatı tərəfindən bir neçə sinif otağı tikilib.
Məktəbin müəllim və texniki işçiləri verilən qərarla razılaşmaq istəmirlər.
Məktəb direktoru Etibar Nəbiyev isə bildirib ki, təhsil ocağı uzun illərdir, köçkün həyatı yaşayır. İki il əvvəl Qaradəmirçi kəndinin ərazisində müasir standartlara uyğun yeni məktəb binası tikildiyindən şagirdlər həmin məktəbə yönəldiliblər. Məktəbdə təhsil almaq üçün 4 uşaq qalıb.
Mövzu ilə bağlı Şərqi Zəngəzur Regional Təhsil İdarəsindən isə bildirilib ki, sözügedən məktəb bağlanmayıb, fəaliyyətini davam etdirir. Məktəbin bağlanması ilə bağlı rəsmi qərar yoxdur.
Gələcəkdə şagird sayının kəskin azalması ilə bağlı olaraq Aşağı Fərəcan kənd tam orta məktəbinin fəaliyyəti dayandırılarsa, məktəbin pedaqoji və texniki heyətinin digər ümumitəhsil müəssisələrində ixtisasları üzrə işlə təmin olunması məsələsinə baxılacaqdır.
Daha ətraflı videomaterialda:
Bizim.Media
