Şimal rayonlarına ötən gün yağan güclü sel fəsadlara yol açıb. Quba və Qusarın çaylarına güclü sel gəlib.
Bizim.Media-nın əldə etdiyi məlumata görə, Qubanın Yerfi kəndini rayon mərkəzi ilə birləşdirən körpünü sel suları bərbad günə salıb, hərəkət çətinləşib.
Qaraçaya gələn güclü sel nəqliyyat vasitələrinin hərəkətini xeyli çətinləşdirib.
Quba Rayon İcra Hakimiyyətinin başçısının birinci müavini, rayon Fövqəladə Hallar Komissiyasının (FHK) sədri Tariyel İbrahimov sel sularının Yerfi kəndi ərazisindəki körpünün bir hissəsini dağıtdığını təsdiqləyib.
Onun sözlərinə görə, selin fəsadını aradan qaldırmaq üçün yol idarəsinin əməkdaşları hazırda ərazidədir, bərpa işlərinə başlayıblar. Quba, Qusar, Xaçmaz rayonlarında müşahidə edilən güclü selin fəsadlarının dəqiqləşdirilməsi işlərinə də başlanılıb.
Aytəkin Alxaslı, Bizim.Media, Şimal bürosu
