“Turan Tovuz” CƏZALANDIRILDI

AFFA-nın İntizam Komitəsinin iclası keçirilib.

Bizim.Media xəbər verir ki, yığıncaqda Misli Premyer Liqasının XXI turunun oyunlarında baş verənlər müzakirə olunub.

“Sabah”ın futbolçusu İqor Noqeyra “Kəpəz”lə matçda qırmızı vərəqə aldığı üçün 1 oyun cəzalanıb, klub 500 manat cərimələnib. “Neftçi” – “Şamaxı” qarşılaşmasında 5 futbolçusu sarı vərəqə alan qonaqlar 700 manat cərimə edilib.

“Turan Tovuz” – “Səbail” oyununda meydan sahiblərinin futbolçusu Kauan Martins 45-ci dəqiqədə birbaşa qırmızı vərəqə alıb. O, 1 matçlıq cəza alıb, klub 1000 manat xərcə düşüb.

Tovuz təmsilçisinin məşqçisi Ruslan Abışov birbaşa qırmızı vərəqə aldığı üçün 1-i şərti olmaqla 2 oyun cəzalanıb. Sınaq müddəti 3 ay təyin edilib. Klub 1500 manat cərimə ödəyəcək. “Turan Tovuz” azarkeşləri tərəfindən hakimlərin ünvanına kütləvi şəkildə təhqiramiz ifadələr səsləndirildiyinə görə qərblilər daha 1000 manat ziyana düşüb.

“Sumqayıt” – “Araz-Naxçıvan” qarşılaşmasında 4 futbolçusu sarı vərəqə alan qonaq komanda 700 manat cərimə edilib.

“Zirə – “Qarabağ” oyunu bitdikdən sonra meydançaya kənar şəxs daxil olduğuna görə qəsəbə klubu 800 manat cərimələnib.

Bizim.Media