16 yaşlı idmançı: “Çox keçmədi ki, digər yoldaşlarımdan fərqləndim” - FOTO

Hazırda oxunan: 16 yaşlı idmançı: “Çox keçmədi ki, digər yoldaşlarımdan fərqləndim” - FOTO

232927

Bölgələrimizdə gənclər idmanın bir çox növü ilə məşğul olur. Amma avarçəkmə növünə çox nadir hallarda rast gəlmək olur.

Bizim.Media-nın gənclər günündə müsahibi mingəçevirli gənc - avarçəkmə idman növündə bir sıra nailiyyətlərə imza atmış Əlmurad Hacızadədir.

Əlmuradın 16 yaşı var. Deyir ki, bu idman növü ilə il yarımdır məşğul olur:

“Kayak növü ilə məşğul olmağa 2023-cü ilin may ayından başladım. Mingəçevir Təhsil sektorunun nəzdində fəaliyyət göstərən UGİŞM-nin avarçəkmə bölməsinə yazıldım. Məşqçimiz Namiq Əzizovun rəhbərliyi ilə bu maraqlı idman növünün əlifbasını, sirlərini öyrənməyə başladım.

Çox həvəslə məşqlərimi davam etdirdim. Bu əzmkarlığımın və idmana olan həvəsimin nəticəsində çox keçmədi ki, digər yoldaşlarımdan fərqlənməyə başladım. Əlbəttə, avarçəkmə çətin idman növüdür. Bu idman növü üçün güc, dözümlülük, sürət, cəldlik fiziki keyfiyyətlərlə yanaşı iradi keyfiyyətlərdə vacib amillərdəndir. Avarçəkmə idmanı mübarizlik, əzmkarlıq nümayiş etdirən idman növü sayılır”.

Əlimurad Hacızadənin sözlərinə görə, bu idman növünə həvəs onda uşaqlıqdan yaranıb.

Bildirir ki, uşaqikən həmişə anası ilə Mingəçevir şəhərinin "Kür" OTİM- nə gəlib canlı şəkildə tamaşaçılar üçün ayrılmış tribunadan yarışları izləyib. Nəhayət, o qərara alır ki, avarçəkmə ilə məşğul olsun. Yoldaşları onun üçün yaşının gec olduğunu desələr də, o, bu istəyindən əl çəkmir. Ailəsinin dəstəyi ilə avarçəkmə ilə məşğul olmağa başlayır.

O, qısa zamanda nailiyyəttlər əldə edir. 2024-cü ilin idman yekunlarına görə nailiyyətləri çox yüksək olur.

2024-cü ilin iyun ayının 1-də Qazaxıstanın Uralsk şəhərində keçirilən Beynəlxalq yarışda 1-ci yeri qazanır. Daha sonra Slovakiyanın paytaxtı Bratislava şəhərində Yeniyetmələr və Gənclər arasında Avropa çempionatında 5-ci, Türkiyənin Əskişəhər "Durğunsu" Beynəlxalq turnirdə K-1.200m.500m.məsafələrdə l-ci, Rusiyanın Barnaul şəhərində keçirilən Beynəlxalq yarışda K-1.200 m.1000m. l-ci yeri qazanır.

Əlimurad ölkədaxili çempionatlarda bir neçə dəfə ilk yerləri qazanır.

O, hazırda məşqlərini bacarıqlı məşqçi Mirnazim Cavadovun rəhbərliyi ilə davam etdirdiyini bildirib, 2025-ci ildə də uğurlar qazanmaq əzmində olduğunu deyib.

Leyla Vəfadarqızı, Bizim.Media