Azərbaycanın müdafiə sənayesi naziri Mədət Quliyevin rəhbərlik etdiyi nümayəndə heyəti martın 21-23-də Dohada keçirilən 7-ci “DIMDEX-2022” Beynəlxalq Dəniz Müdafiə Sərgi və Konfransında iştirak edib.
Bizim.Media xəbər verir ki, ABŞ, Böyük Britaniya, Fransa, İtaliya, Türkiyə, Cənubi Koreya və s. ölkələrin aparıcı şirkətlərinin dəniz müdafiəsində yeni texnologiyaları, hərbi gəmiqayırma avadanlıqları, dəniz müdafiəsi sisteminin köməkçi və dəstək texnologiyalarının nümayiş etdirildiyi sərgi çərçivəsində Mədət Quliyev Qətər Dövlətinin Baş naziri və daxili işlər naziri Xalid bin Xəlifə bin Əbdüləziz Al Tani və Baş nazirin müavini və müdafiə işləri üzrə nazir Xalid bin Məhəmməd Əl Attiyah ilə görüşlər keçirib.
MÖVZU İLƏ BAĞLI:
Mədət Quliyev "Dubai Airshow-2021" sərgisində - FOTO
Görüşlərdə Azərbaycan Respublikası ilə Qətər Dövləti arasında müdafiə sənayesi sahəsində əməkdaşlığın perspektivləri ətrafında fikir mübadiləsi aparılıb.
Mədət Quliyev sərgidəki Türkiyə pavilyonu ilə də tanış olub, burada qardaş ölkənin Müdafiə Sənayesi Komitəsinin sədri İsmayil Demir ilə görüşüb.
Görüş zamanı hərbi-texniki sahədə qarşılıqlı maraq doğuran məsələlər müzakirə edilib. Nazir, eyni zamanda, Türkiyəyə məxsus olan “Havelsan”, “Roketsan” və “Turkish Aerospace” şirkətlərinin stendlərini də ziyarət edib.
Sonra müdafiə sənayesi naziri “Barzan Holdings” şirkətinin prezidenti Nasser Hassan Al Naimi ilə görüşüb.
Görüş zamanı Müdafiə Sənayesi Nazirliyinin tabeli müəssisələri ilə “Barzan Holdings” şirkətinin müəssisələri arasında müdafiə təyinatli məhsulların birgə istehsalı sahəsində əməkdaşlıq imkanları müzakirə edilib.
Bizim.Media
