Zelenski Aİ-dən Ukraynaya əlavə 70 milyard avro İSTƏDİ

Ukrayna Prezidenti Volodimir Zelenski Avropa İttifaqını (Aİ) 2027-ci ildə Kiyevə müdafiə, silahlanma və ölkənin dayanıqlılığının təmin edilməsi üçün ən azı 70 milyard avro əlavə vəsait ayırmağa çağırıb.

Bizim.Media xəbər verir ki, Zelenski bu barədə Avropa Şurasının iclasının iştirakçılarına videomüraciətində bildirib.

Onun sözlərinə görə, Ukraynanın gələn il müharibə ilə bağlı ümumi xərcləri 155 milyard avro təşkil edəcək. Prezident əlavə maliyyələşmənin dron istehsalını 2-3 dəfə artırmağa və Rusiyaya təzyiqi gücləndirməyə imkan verəcəyini vurğulayıb.

Zelenski, həmçinin Aİ-ni Rusiyaya qarşı növbəti sanksiyalar paketini qəbul etməyə çağırıb. O, məhdudiyyətlərin Rusiya ballistik raketlərinin, rabitə sistemlərinin və dronlarının istehsalçılarına, eləcə də Rusiyanın maliyyə sistemində iştirak edən şəxslərə şamil olunmasının vacibliyini qeyd edib.

Ukrayna Prezidenti məhdudiyyətlərin yumşaldılmasının Rusiyaya, o cümlədən sözügedən “dizel sazişi” vasitəsilə əlavə gəlir əldə etməyə imkan verdiyini bildirib.

Bundan əlavə, Zelenski Aİ-nin 2028-ci ildən sonrakı dövr üçün büdcəsi hazırlanarkən Ukraynanın müdafiə potensialının nəzərə alınmasını istəyib. O, Avropa və ABŞ arasında birliyin qorunmasının vacibliyini də vurğulayıb.

Bizim.Media