ABŞ Prezidenti Donald Tramp İranla bağlı ABŞ-İsrail müharibəsini və mümkün növbəti addımları müzakirə etmək üçün İraqdakı kürd liderlərlə telefon danışığı aparıb.
Bizim.Media xəbər verir ki, bu barədə Axios üç məlumatlı mənbəyə istinadən yazıb.
Bildirilir ki, kürdlər İran-İraq sərhədi boyunca minlərlə hərbçi yerləşdiriblər və müharibənin gedişində strateji əhəmiyyət daşıya biləcək ərazilərə nəzarət edirlər. İraq kürdlərinin həmçinin İrandakı kürd azlığı ilə sıx əlaqələri var.
İki mənbənin sözlərinə görə, Tramp bombardman kampaniyasının başlanmasından bir gün sonra İraqdakı iki əsas kürd fraksiyasının liderləri — Məsud Bərzani və Bafel Tələbani ilə danışıb. Danışıqların məzmunu ilə tanış olan başqa bir mənbə zənglərin “məxfi xarakter” daşıdığını bildirib və detalları açıqlamaqdan imtina edib.
Digər mənbəyə görə, bu telefon danışıqları İsrailin baş naziri Benyamin Netanyahunun aylarla davam edən pərdəarxası lobbiçilik fəaliyyətinin kulminasiyası olub. İsrail onilliklərdir Suriya, İraq və İrandakı kürdlərlə təhlükəsizlik, hərbi və kəşfiyyat sahələrində sıx əlaqələr saxlayır.
“Netanyahu hesab edir ki, kürdlər tezliklə kölgədən çıxaraq ayağa qalxacaqlar”, – deyə mənbələrdən biri bildirib.
Bizim.Media
