Braziliya, İspaniya, Kolumbiya, Meksika, Uruqvay və Çili Venesueladakı hadisələrlə bağlı birgə bəyanat qəbul ediblər.
Bizim.Media xəbər verir ki, İspaniyanın yaydığı bəyanatda Venesuelada birtərəfli hərbi əməliyyatlar rədd edilir:
"Biz Venesueladakı hadisələrlə bağlı dərin narahatlığımızı bildiririk və Venesuela ərazisində həyata keçirilən, beynəlxalq hüququn fundamental prinsiplərinə, xüsusən də güc tətbiqi və ya təhdidinin qadağan edilməsinə, BMT Nizamnaməsində təsbit edildiyi kimi dövlətlərin suverenliyinə və ərazi bütövlüyünə hörmətə zidd olan birtərəfli hərbi əməliyyatları rədd edirik. Bu hərəkətlər sülh və regional təhlükəsizlik üçün son dərəcə təhlükəli bir presedent yaradır və mülki əhalini təhdid edir".
Bəyanatda qeyd olunur ki, Venesueladakı vəziyyət yalnız dinc yolla, dialoq, danışıqlar və Venesuela xalqının iradəsinə hörmət yolu ilə, xarici müdaxilə olmadan və beynəlxalq hüquqa uyğun olaraq həll edilməlidir:
"Biz beynəlxalq hüquqa zidd olan və regionun siyasi, iqtisadi və sosial sabitliyini təhdid edən təbii və ya strateji sərvətlərin dövlət nəzarətinə, idarə olunmasına və ya xarici mənimsənilməsinə yönəlmiş hər hansı bir cəhdlə bağlı narahatlığımızı bildiririk".
Bizim.Media
