İsveçrədə keçirilən Dünya Pendir Müsabiqəsində 5 minə yaxın pendir növü arasında birinci yerə İsveçrə istehsalı yetişmiş Gruyère layiq görülüb.
Bizim.Media milli.az-a istinadən xəbər verir ki, münsiflər heyəti pendirin unikal aroması və uzun davam edən dadına görə ona tam bal verib.
Dağ südçülük təsərrüfatında istehsal olunan yetişmiş Gruyère, güclü aroması və balanslı quruluşu ilə rəqiblərini geridə qoyub. Münsiflər pendirin nadir rast gəlinən aromatik keçidləri və ağızda buraxdığı uzun dad profilinin qərarda həlledici rol oynadığını vurğulayıb.
Finalda pendiri dəyərləndirən britaniyalı mütəxəssis Perry Wakeman dadı belə təsvir edib:
“Ağızda yağlı karamellə qovrulmuş şəkərin notları hiss olunur. Ədviyyat, meyvə və yüngül kömür dadının birləşməsi çoxqatlı bir aroma yaradır. Üç fərqli pendir dadandan sonra belə bu pendirin dadı hələ də damaqda qalırdı.”
Dəyərləndirmə zamanı bütün pendirlər üzərində heç bir işarə olmayan ağ masalarda təqdim edilib. Manchego, Brie, Parmesan, Gouda kimi klassik növlərlə yanaşı, inək, qoyun, camış, dəvə və hətta eşşək südündən hazırlanan qeyri-adi pendirlər də yarışmada yer alıb. Bəzilərinin çiçəklərlə bəzədilmiş rəngli qabıqları belə münsiflərin diqqətini çəkib.
Gruyère istehsalçısı Pius Hitz ənənəvi istehsal balansını qorumaq üçün istehsal gücünü artırmağı düşünmədiklərini deyib. O, birinci yerin “illərin zəhmətinin qarşılığı” olduğunu bildirib.
Beynəlxalq nüfuza malik Dünya Pendir Müsabiqəsi hər il fərqli ölkədə təşkil olunur. 2026-cı il yarışması isə İspaniyanın Kordoba şəhərində keçiriləcək.
Bizim.Media
