İsrail ordusu şənbə günü Qəzza sektorunda HƏMAS mövqelərinə zərbələr endirib.
Bu, 10 oktyabr tarixindən qüvvədə olan atəşkəs üçün növbəti sınaq hesab olunur. Netanyahunun ofisi beş yüksək rütbəli HƏMAS üzvünün zərərsizləşdirildiyini bildirib.
Bizim.Media xəbər verir ki, bu barədə informasiyanı Qəzza Təcili Tibbi Yardım Xidməti yayıb.
Mənbə 24 nəfərin həlak olduğunu, 54 nəfərin yaralandığını qeyd edib. Onların arasında uşaqlar da var.
Gərginliyin artması BMT Təhlükəsizlik Şurasının Qəzzanın idarə olunmasına dair ABŞ planını təsdiqləməsi fonunda baş verib.
Bu plana Qəzzada beynəlxalq sabitləşdirmə qüvvələrinin yerləşdirilməsi, Donald Trampın nəzarətində keçid administrasiyasının yaradılması və müstəqil Fələstin dövlətinə aparan mümkün yol daxildir.
Həftənin əvvəlində də İsrailin 12 saatlıq hava zərbələri nəticəsində 33 fələstinli həlak olmuşdu. Onların əksəriyyəti qadınlar və uşaqlar idi.
Bizim.Media





























































































