Paşinyan Moskvada Putini bərk-bərk qucaqladı - FOTO

Bölgədəki nəqliyyat marşrutlarının bərpası Ermənistana yeni inkişaf fürsətləri verəcək. 

Bizim.Media xəbər verir ki, bunu Rusiya Prezidenti Vladimir Putin Moskvada Ermənistanın Baş naziri Nikol Paşinyanla görüşündə deyib.

"Əlbəttə, ikitərəfli münasibətlərin qurulması baxımından danışacağımız bir şey var. Ən aktual, ən kəskin problemlər Dağlıq Qarabağdakı və ətrafındakı vəziyyətin normallaşmasıdır". Kremlin sahibi belə deyib.

Putinə görə, strateji xarakter daşıyan ikitərəfli münasibətlərin nə qədər dərin olduğu barədə danışmağa ehtiyac yoxdur.

"Ancaq yenə də Ermənistan iqtisadiyyatına qoyulan bütün kapital qoyuluşlarının 40 faizinin Rusiya mənşəli olduğunu xatırlatmağı vacib hesab edirəm. Bizim möhkəm ticarət dövriyyəmiz var. Eyni zamanda, müxtəlif səbəblərdən, son bir ildə, ilk növbədə koronavirusa görə bir az azalma müşahidə edirik ", - Putin söyləyib.

Putin qeyd edib ki, iki ölkənin hökumətlərarası komissiyası fəal işləyir, Paşinyan onun fəaliyyətini fəal şəkildə dəstəkləyir. 

Rusiya Federasiyasının Prezidenti vurğulayıb ki, bölgədəki inkişafı müzakirə etmək üçün bu yaxınlarda Rusiya Baş nazirinin müavini İrəvanda olub.

"Müharibədən sonrakı vəziyyəti nəzərdə tuturam. Bu mövzunu dəfələrlə müzakirə etmişik. Ən vacib komponent ticarət və iqtisadi əlaqələrin, bölgədəki nəqliyyat yollarının bərpası ehtimalıdır. Beləliklə, Ermənistanın özü yeni imkanlar əldə etməlidir. Mənim fikrimcə , bu son dərəcə vacib bir şeydir”, deyə Putin əlavə edib.

O, bir sıra digər məsələləri də müzakirə etməyin mümkün olacağını vurğulayıb.

Qeyd edək ki, görüşdən əvvəl Paşinyanın Putini bərk-bərk qucaqladığı da operatorların diqqətindən yayınmayıb. Bu foto bir andaca dünya mediasında tirajlanıb.

Bizim.Media