Dövlət İmtahan Mərkəzindən iyulun 21-də verilən açıqlamaya görə, ali təhsil müəssisələrinə qəbul imtahanlarının ikinci cəhdində qayda pozan, o cümlədən üzərində mobil telefon aşkarlanan abituriyentin birinci cəhd imtahanında topladığı nəticəsi də ləğv olunur.
Bu isə cəmiyyət tərəfindən heç də müsbət qarşılanmayıb. Belə ki, sosial şəbəkə istifadəçilərinin rəyləri Mərkəzin bu qərarının ədalətsizlik olduğu yönündədir.
Çünki abituriyentin ilk cəhd imtahanından heç bir pozuntusu aşkar olunmayıbsa, o, nə üçün cəzalandırılmalıdır?
MÖVZU İLƏ BAĞLI:
Universitetlər tələbəni necə TƏLƏYƏ salır? – Maraqlı TƏZAD
Təhsil eksperti Elçin Əfəndi də Bizim.Media-ya açıqlamasında 2-ci imtahandakı pozuntuya görə ilk cəhdin nəticələrinin ləğv olunmasında ədalətsizliyin ola biləcəyini qeyd edib:
“Ümumilikdə, qaydaları pozanların cəzalandırılmasını ədalətsizlik hesab etmirəm. Çünki imtahanlarda abituriyentlər öz bilik və bacarıqlarına görə qiymətləndirmə aparılır. Gələcəkdə ixtisaslı kadrların hazırlanması üçün qəbul imtahanları aparılır. Biz əgər bu mərhələdə müəyyən qeyri-leqal yollara əl atırıqsa, bunun gələcək üçün hansı fəsadlara yol açacağını da görmək elə də çətin deyil.
2-ci imtahandakı pozuntuya görə birinci imtahanın nəticəsinin ləğv olunmasını isə müəyyən mənada ədalətsizlik hesab oluna bilər. Lakin bunun edilməsi də abituriyentlər üçün örnək olur. Çünki həmin abituriyentlər artıq özləri də bilirlər ki, ilk imtahanın nəticələri də ləğv olunur.
Bu da digər imtahanlarda oxşar pozuntuya cəhd edənlərin sayının azalmasına təsir edir. Düşünürəm ki, buna ədalətsizlik kimi yanaşsaq da, ümumi prosedura sözün həqiqi mənasında ciddi təsir etmir”.
Murad Əhmədov, Bizim.Media
