Məşhur Xarı bülbül çiçəyini hər evdə yetişdirmək mümkün olacaq – FOTO 

Bundan sonra tarixi qələbəmizin simvolu, məşhur Xarı bülbül çiçəyini hər evdə, hər həyətdə yetişdirmək mümkün olacaq. 

Bizim.Media olaraq bu özəl məlumatı Tərəvəzçilik Elmi-Tədqiqat İnstitutunda olarkən əldə etdik. İnstitutun idarə heyətinin sədri Elmar Allahverdiyev adı Şuşa ilə birgə çəkilən Xarı bülbülün yetişdirilmə zərurətindən danışıb: 

"Tarixi zəfərimizdən sonra Xarı bülbül çiçəyinin mədəniləşdirilməsi - yəni əkilib-becərilməsi halına  salmaq məsələsi qaldırıldı.

Bir neçə müəssisəyə müraciət olunub. Bizim institutda aqrobio texnologiya laboratoriyası güclü olduğundan burada yetişdirməyə başladıq.

Xarıbülbülün yumrularını - yəni soğanlarını dostlarımızın vasitəsilə Şuşadan gətirtdik. Mütəxəssislərimiz üzərində işlədilər. Süni şəraitdə  8-ə qədər qida mühiti yaratdıq və birində alındı. Təcrübəmiz müsbət effekt verdi". 

Elmar Allahverdiyev qeyd edib ki, hazırda təcrübə-eksperimentlər uğurla davam edir: 

“Xarı bülbülün çiçək açacağını gözləyirik. Tam nəticə əldə edəndən sonra bu çiçəyi həm özümüz yetişdirəcəyik, həm də yetişdirmək istəyən müəsssisələrə və şəxslərə metodiki köməklik edə biləcəyik”. 

Aytəkin Alxaslı, Bizim.Media