“Cərimələrin və rüsumların artırılmasından əvvəl vətəndaşların maaşı qaldırılmalıdır”.
Bu sözləri Bizim.Media-ya açıqlamasında Milli Məclisin üzvü Fazil Mustafa son günlər ciddi müzakirə mövzusuna çevrilən rüsumların və cərimələrin artırılması məsələsindən danışarkən deyib.
MÖVZU İLƏ BAĞLI:
Fazil Mustafa: “Bu cərimədən başqa nə artım varsa, hamısı ədalətsizdir” - VİDEO
Deputatın fikrincə, vətəndaşın marağına toxunan istiqamətdə cərimələrin olması vətəndaşın xeyrinə ola bilməz:
“Amma vətəndaşa xidmət edən qurumların, yaxud hüquqi şəxslərin fəaliyyətində olan inzibati hüquqpozmalara görə cərimələrin artırılması vətəndaşın xeyrinədir. Məsələn, parklanma məsələsində cərimələr absurd görünür. Məgər, yetərincə parklanma yeri yaradırsız ki, cərimə də tətbiq edirsiz?
Vətəndaş 5 dəqiqəlik düşüb, aptekdən dərman almaq istəyir, yaxud iş yerinə yaxın yerdə saxlamalıdır. Sən isə parklanma yeri açmısan və qiymətləri kəlləçarxa qaldırmısan.
İşə gedən və avtomobilini park etdiyi yerdə 8 saata görə 5 manat ödəyən bir vətəndaşın maaşının böyük hissəsi parklanmaya gedir. Bu, necə vətəndaşın xeyrinə ola bilər? Hər halda bu məqamları nəzərə almaq lazımdır”, - deyə millət vəkili qeyd edib.
Alçina Amilqızı, Bizim.Media
