Bakı Apellyasiya Məhkəməsində qəsdən sağlamlığa ağır zərər vurmada və xuliqanlıqda təqsirləndirilən Əhməd Rəfiyevin (adı, soyadı şərtidir) barəsindəki hökmdən dövlət ittihamçısı tərəfindən verilən apellyasiya protesti üzrə məhkəmə iclası yekunlaşıb.
Bizim.Media xəbər verir ki, hakim Habil Məmmədovun sədrliyi ilə keçirilən prosesdə qərar elan olunub.
Qərara əsasən, apellyasiya protesti qismən təmin edilib, Bakı Ağır Cinayətlər Məhkəməsinin hökmü ləğv olunub, ona 5 il 1 ay 16 gün müddətinə azadlıqdan məhrum etmə cəzası təyin edilib. Təqsirləndirilən şəxs məhkəmə iclas zalında dərhal həbsə alınaraq Ədliyyə Nazirliyi Penitensiar Xidmətinin Bakı İstintaq Təcridxanasına təhvil verilib.
İttihama görə, hadisə 05 dekabr 2023-cü il tarixdə gecə saat 01 radələrində Binəqədi rayonu, Xocəsən qəsəbəsində yerləşən “Şollar” kimi tanınan kafedə baş verib.
Belə ki, Əhməd Rəfiyev şəxsiyyəti istintaqla müəyyən edilməmiş “Aydın” adlı şəxslə birlikdə bir qrup şəxs halında kafedə olan çoxsaylı müştərilərin gözü qarşısında ictimai qaydanı kobud şəkildə pozub.
Araşdırmalarla müəyyən edilib ki, təqsirləndirilən şəxs özünü digərlərindən üstün və müstəsna şəxsiyyət kimi göstərmək məqsədilə cəmiyyətin qəbul etdiyi davranış qaydalarına açıq hörmətsizlik nümayiş etdirərək qərəzli hərəkətlər edib. O, əvvəlcə kafedə müştəri qismində olan zərərçəkmiş şəxslərdən birinə – Dadaş Kərimovun (adı, soyadı şərtidir) sifət nahiyəsinə yumruqla zərbələr endirib.
Daha sonra yaranmış mübahisə dava-dalaşa çevrilib. Bu zaman Əhməd digər zərərçəkmiş Zahid Yusifovun (adı, soyadı şərtidir) bıçaqla qarın nahiyəsindən bir dəfə zərbə vurub. Nəticədə zərərçəkmiş şəxsə qarının ön divarının sol qabırğaaltı nahiyəsindən periton boşluğuna nüfuz edən, mədəni zədələyən və daxili qanaxma ilə müşayiət olunan deşilmiş-kəsilmiş yara xəsarəti yetirilib.
Məhkəmə-tibbi ekspertizasının rəyinə əsasən, qeyd olunan xəsarət zərərçəkmiş şəxsin həyatı üçün təhlükəli olmaqla sağlamlığa ağır zərər kimi qiymətləndirilib.
Təqsirləndirilən şəxsin əməli ibtidai istintaq orqanı tərəfindən Cinayət Məcəlləsinin 126.2.4 və 221.3-cü maddələri ilə tövsif edilib. Lakin birinci instansiya məhkəməsi tərəfindən əməl yenidən hüquqi qiymət verilərək Cinayət Məcəlləsinin 126.1 və 221.2.1-ci maddələri ilə tövsif olunub və təqsirləndirilən şəxs həmin maddələrlə təqsirli bilinib.
Bakı Ağır Cinayətlər Məhkəməsinin hökmü ilə Əhməd Rəfiyevə şərti cəza təyin edilmişdi. (Pravda.az)
Bizim.Media
