Xəzər Rayon Məhkəməsində qəsdən sağlamlığa az ağır zərər vurmada təqsirləndirilən Nizami Ələkbərovun (adı, soyadı şərtidir) cinayət işi üzrə məhkəmə istintaqı yekunlaşıb.
Bizim.Media xəbər verir ki, hakim Toğrul Məmmədovun sədrliyi ilə keçirilən prosesdə hökm oxunub.
Məhkəmənin hökmü ilə “Konstitusiya və Suverenlik İli” münasibətilə amnistiya elan edilməsi haqqında” Milli Məclisin Qərarının 5.1-ci bəndinə əsasən təqsirləndirilən şəxs barəsində Cinayət Məcəlləsinin 128-ci maddəsi ilə olan cinayət təqibinə və böyük ictimai təhlükə törətməyən aşkar cinayətlərə dair məhkəməyədək sadələşdirilmiş icraat materialı üzrə icraata xitam verilib.
İttihama görə, Nizami Ələkbərov ötən il yaşadıqları Xəzər rayonu ərazisində yerləşən mənzildə həyat yoldaşı, zərərçəkmiş İradə Ələkbərova (adı, soyadı şərtidir) ilə aralarında yaranmış mübahisə zəminində masanın üzərindən götürdüyü qənd qabı ilə onun sifət nahiyəsinə bir dəfə qəsdən zərbə vurub. Nəticədə qadına alın nahiyəsinin əzilmiş yarası, hematoma və qançır, eləcə də sağ əlin qansızması ilə müşayiət olunan, sağlamlığa yüngül dərəcəli zərər vuran bədən xəsarətləri yetirilib. Bununla da təqsirləndirilən şəxs Cinayət Məcəlləsinin 128-ci maddəsində nəzərdə tutulmuş cinayət əməlini törədib.
Məhkəmə iclasında Nizami Ələkbərov özünü təqsirli bilib və “Konstitusiya və Suverenlik İli” münasibətilə amnistiya elan edilməsi haqqında Milli Məclisinin Qərarına əsasən barəsində Cinayət Məcəlləsinin 128-ci maddəsi ilə olan cinayət təqibinə və cinayət işinin icraatına bəraətverici əsaslar olmadan xitam verilməsini xahiş etmişdi.
Zərərçəkmiş şəxs isə məhkəmə iclasında “Konstitusiya və Suverenlik İli” münasibətilə amnistiya elan edilməsi haqqında” Milli Məclisinin müvafiq Qərarının 5.1-ci bəndinin tətbiq edilməsinə etiraz etmədiyini bildirmişdi. (Pravda.az)
Bizim.Media
