1 oktyabr-Prokurorluq işçilərinin peşə bayramı günündə Vətən Müharibəsi şəhidi, prokurorluq orqanında çalışmış 25 yaşlı Yüksəl Əlizadəni xatırlayacağıq.
Qardaşı Aqil danışır ki, Yüksəl Gəncə şəhər prokurorluğunda aparıcı mütəxəssis vəzifəsində çalışırdı.
O, hələ 2020-ci il iyul ayında baş verən Tovuz hadisələri zamanından çox narahat idi,cəbhəyə getmək istəyirdi. Bu məqsədlə Yüksəl Səfərbərlik və Hərbi Xidmətə Çağırış üzrə Dövlət Xidmətinin Gəncə şəhər şöbəsinə ərizə yazdı və səfərbərlik xəttilə sentyabrın 21-də təlimlərə qatıldı.
Xatırladaq ki, Yüksəlin qardaşı Respublika Prokurorluğu yanında Korrupsiyaya Qarşı Mübarizə Baş İdarəsində prokuror, digər qardaşı isə hüquq mühafizə orqanlarında çalışır.
Vətən Müharibəsi başlayanda könüllü döyüşlərə qoşulan Yüksəl öz vətənpərvərliyi ilə "vəzifəlilərin övladları heç vaxt cəbhəyə getmir” mifini öz hərəkətləri ilə alt-üst etdi. O, sübut etdi ki, Vətəni sevmək heç də vəzifədən, varlı- kasıb olmaqdan deyil.
Qardaşı bildirir ki, Yüksəl ali təhsilini tarix fakultəsində alıb. O, Gəncə şəhər prokurorluğunda çalışa-çalışa təhsilini Naxçıvan Dövlət Universitetində hüquq fakultəsində davam etdirirdi.
Yüksəlin vəsiyyəti...
Yüksəl şəhid olmamışdan bir müddət əvvəl qardaşı Aqilin oğul atası olacağını eşidib. "Adını Yüksəl qoyarsınız. Zarafatsız, mənim adım yaddaqalan, gözəl addır", - deyib. Əizadələr ailəsində indi 10 aylıq Yüksəl böyüyür.
Yüksəl Əlizadə ölümündən sonra Azərbaycan Prezidenti İlham Əliyev tərəfindən "Xocavəndin azad olunmasına görə", "Vətən uğrunda", "Döyüşdə fərqlənməyə görə" medallarılə təltif edilib.
Baş prokuror Kamran Əliyev şəhid prokurorluq işçilərinin ailələrilə görüş zamanı şəhid Yüksəl Əlizadəni "Azərbaycan Prokurorluğunun 100 illiyi (1918-2018) Azərbaycan Respublikasının “Yubiley medalı" ilə təltif edib. Medal şəhidin qardaşı Aqilə təqdim olunub.
Həmin səs yazısını təqdim edirik:
Aytəkin Alxaslı, Bizim.Media
