El arasında “Malakan bağı” kimi tanınan “Xəqani” parkında söküntü işlərinə Səbail Rayon İcra Hakimiyyətindən aydınlıq gətirilib.
“Valideynlər qoy, narahat olmasın, biz uşaqar üçün olan hissəni yenidən daha səmərəli şəkildə bərpa edəcəyik”.
Bunu Bizim.Media-ya açıqlamasında Səbail Rayon İcra Hakimiyyətinin müavini Vüqar Şıxməmmədov deyib:
“Xəqani bağındakı uşaq parkının istismarı başa çatdığı üçün sökülüb. Bu, bütövlükdə bağın sökülməsi anlamına gəlməməlidir. Söküntü- təmir işlərinə 2-3 gündür ki, start verilib. Uşaqlar üçün nəzərdə tutulan park yaxın günlərdə yeni əyləncə meydançası ilə əvəz olunacaq”.
Vüqar Şıxməmmədov onu da əlavə edib ki, parkın təmir olunması ilə yanaşı əraziyə yeni attraksionlar da quraşdırılacaq.
Həmçinin, yeni təmir olunan park bağın Rəsul Rza və Xəqani küçələrinin kəsişməsində yerləşən hissəsində daha geniş şəkildə salınacaq.
Gülşanə Mustafayeva, Bizim.Media
