Bir müddət öncə filippinli qadını qanunsuz olaraq
müvafiq dövlət qurumundan icazə almadan öz evində qulluqçu qismində işlədərək
onu istismar etdiyinə görə Daxili İşlər Nazirliyinin İnsan Alverinə Qarşı
Mübarizə İdarəsi əməkdaşları tərəfindən ifşa edilərək barəsində cinayət işi
qaldırılmış Aynurə Mehdiyevanın işində yenilik var. “Miqrantlara Hüquqi yardım ”İctimai
Birliyinin sədri, tanınmış hüquq müdafiəçisi Əlövsət Əliyevin Moderator.az-a
verdiyi məlumata görə artıq Aynurə Mehdiyeva ilə filippinli qadının üzləşməsi
başa çatıb: “Üzləşmə zamanı Filippinli xanım onun üzünə dedi ki, istismar edib
və əmək haqqını ödəməyib. Bu, bir daha təsdiq edir ki, Filippinli istismara
məruz qalıb.”
Qeyd edək ki, Əlövsət Əliyevin rəhbəri olduğu
təşkilat istismara məruz qalmış filippinli qadının pozulmuş hüquqlarını
təmənnasız olaraq qorumağı öz üzərinə götürüb və qurumun hüquqşünasları
mütəmadi olaraq DİN-in sığınacağına yerləşdirilmiş qadına baş çəkərək onun
səhhəti, saxlanma şəraiti ilə maraqlanırlar, lazımi hüquqi yardım göstərirlər.
