Artıq Azərbaycan və qonşu Gürcüstanı eyni turizm marşrutu çərçivəsində səyahət etmək mümkün olacaq.
Dövlət Turizm Agentliyindən açıqlanan məlumata görə, Gürcüstanla birgə "Əli-Nino" turizm marşrutu hazırlanır.
Layihəni həyata keçirtməkdə məqsəd Avropadan gələn turistlər üçün hər iki ölkəyə səyahət etmək şansı yaratmaqdır. Bu marşrutla turistlər Azərbaycanda Bakını, Gəncəni, gələcəkdə isə Şuşanı görmək şansı əldə edəcəklər. Qonşu ölkədə səyahət ediləcək yerləri isə Gürcüstan tərəfi hazırlayır və əsas istiqamət Tibilisi olacaq. “Əli-Nino” turizm marşrutu bu il üçün nəzərdə tutulur. Hazırda layihənin üzərində işlər aparılır.
MÖVZU İLƏ BAĞLI:
Qərb bölgəsində turizm niyə zəifdir? - SƏBƏBLƏR
İki Cənubi Qafqaz ölkəsini bir marşrut çərçivəsində gəzmək xarici, eləcə də hər iki ölkənin turistləri üçün cəlbedici olacaqmı? Bu cür marşurutun açılması Azərbaycan turizminin inkişafına hansı töhfəni verəcək?
Turizm eksperti Ceyhun Aşurov Bizim.Media-ya açıqlamasında bildirib ki, bu marşrutun açılması həm Azərbaycan, həm də Gürcüstan turizminə öz faydasını verəcək.
“Bu Azərbaycan və Gürcüstanın ortaq dəyərlərinin olduğunu göstərən bir marşrut xəttidir. Marşrut xəttinin adı da uğurlu seçilib. Bu romantik hekayənin davamı kimi nəzərdə tutula bilər. Bu həm iki ölkənin turisləri üçün, həm də Qafqaz turu etmək istəyən xarici turistlər üçün maraqlı ola bilər. Eyni zamanda gəlirlərin artmasına şərait yaradar”.
Ekspertin sözlərinə görə, əvvələr də iri şirkətlər arasında bu cür marşrut xəttləri mövcud olub:
“Uzaq Şərqdən gələn turistlər üçün Qafqaz səfərləri həyata keçirilirdi. Bir neçə gün Azərbaycanda olurdular, sonra isə Gürcüstana gedirdilər”.
Ceyhun Aşurov ortaq turizm marşrutlarının yaradılması istiqamətində işlərin gələcəkdə də davam etdirilməsini məqsədəuyğun hesab etdiyini deyib:
“Bu cür marşrutların xarici ölkələrə birgə satış modelinin hazırlanması hər iki ölkənin turizminə müsbət təsirini göstərər”.
Xatirə Nəsirli, Bizim.Media
