Xaçmazdakı məktəb hər an uça bilər - FOTOFAKT

Xaçmaz rayonunun Armudpadar kəndindəki 56 yaşlı məktəb qəzalı vəziyyətdədir.

Bu barədə Bizim.Media-ya kənd sakinləri məlumat veriblər. 

Sakinlər vurğulayıblar ki, 1965-cı ildə inşa edilən təhsil ocağının artıq divarlarında çatlar əmələ gəlib. Valideynlər bildiriblər ki, yeni dərs ilində övladlarını bu məktəbə göndərməyə ehtiyat edirlər, çünki məktəb hər an uça bilər. 

Sakinlər tezliklə kənddə müasir məktəbin tikilməsini arzu etdiklərini də vurğulayıblar. 

Xaçmaz rayon təhsil şöbəsinin rəsmisi Ağamirzə Əzimov Bizim.Media-ya açıqlamasında bildirib ki, məktəbin yenidən inşa edilməsinə ehtiyac var. 

Onun sözlərinə görə, artıq Xaçmazın İcra başçısı Elnur Rzayev kənddə yeni-modul tipli məktəbin inşa olunması üçün Təhsil Nazirliyinə müraciət edib.  

Qeyd edək ki, Armudpadar kəndi Xaçmaz rayon mərkəzinin 2 kilometrliyində yerləşir.

Aytəkin Alxaslı, Xaçmaz