Bu şəxslərin təhsil haqqını DÖVLƏT ÖDƏYƏCƏK

İşğaldan azad edilən ərazilərdə məskunlaşan və peşə məktəblərində təhsil alan şəxslərin təhsil haqqı qarşıdakı 3 təhsil ilində dövlət büdcəsinin vəsaiti hesabına ödəniləcək.

Bizim.Media xəbər verir ki, bu, Milli Məclisin bu gün keçirilən plenar iclasında müzakirə olunan “Təhsil haqqında” və “Peşə təhsili haqqında” Qanunlara dəyişiklik edilməsi barədə qanun layihəsində öz əksini tapıb.

Qanun layihəsinə əsasən, işğaldan azad edilmiş ərazilərdə məskunlaşmış və 2025/2026, 2026/2027, 2027/2028-ci tədris illərində dövlət, bələdiyyə və özəl peşə təhsili müəssisələrinə qəbul olunmuş, habelə həmin təhsil müəssisələrində təhsil almaqda olan şəxslərin təhsil müəssisələrində ödənişli əsaslarla təhsil aldıqları müddətdə təhsil haqqı dövlət büdcəsinin vəsaiti hesabına ödəniləcək.

Qanun layihəsi səsverməyə qoyularaq üçüncü oxunuşda qəbul olunub.

Qeyd edək ki, dəyişiklik 2025-ci il sentyabrın 15-dən tətbiq ediləcək.

Günay Şahmar, Bizim.Media