Lerik rayonunda Kiravud kənd ərazi icra nümayəndəsi Şəfiq Əliyevin ölümü ilə bağlı yeni məlumatlar ortaya çıxıb.
Bizim.Media-nın yerli bürosu xəbər verir ki, 30 yaşlı Ş.Əliyev günorta saatlarında iş üçün əraziyə çıxacağını bildirib və həmin andan etibarən onunla əlaqə kəsilib.
Axşam saatlarında yaxınları tərəfindən axtarışa çıxarılan icra nümayəndəsinin avtomobili Boykənd kənd qəbiristanlığının qapısında aşkar edilib. Daha sonra yaxınlarının qəbiristanlıqda apardığı axtarış nəticəsində onun meyiti tapılıb.
Meyit ekspertiza üçün Məhkəmə Tibbi Ekspertiza və Patoloji Anatomiya Birliyinin Lənkəran rayon şöbəsinə göndərilib. Ölümün səbəblərinin müəyyənləşdirilməsi üçün araşdırma davam edir.
Sabutay Nağıyev, Bizim.Media, Cənub bürosu
