Axşam saatlarında Şəkidə yol-nəqliyyat hadisəsi baş verib.
Bizim.Media-nın yerli bürosu xəbər verir ki, Yevlax-Zaqatala-Gürcüstan magistiral yolunun Şəkinin Çeşməli kəndi ərazisindən keçən hissəsində hərəkətdə olan avtomobil qəza törədib.
Hadisə şahidlərinin sözlərinə və ilkin tədqiqatın nəticəsinə əsasən Balakən rayon sakini, 31 yaşlı İmran Məmmədov idarə etdiyi “Hyundai” markalı minik avtomobili ilə hərəkərdə olarkən əraziyə qoyulmuş xəbərdaredici yol nişanını görmədiyindən avtomobili xüsusi zolaqdakı qum topasına çırpıb. Bu zaman nəqliyyat vasitəsi əzilib, avtomobilin sürücüsü yüngül xəsarət alıb.
Lakin avtomobildə olan digər iki şəxs Balakən rayon sakinləri, 43 yaşlı Əziz Kaltayev və 62 yaşlı Fərman Kaltayev müxtəlif dərəcəli bədən xəsarətləri alaraq Şəki Rayon Mərkəzi Xəstəxanasına çatdırıblar.
Yaralılara xəstəxanada ilkin tibbi yardım göstərildikdən sonra həkimlərin rəyi ilə müalicələrini davam etdirmək üçün Balakən Rayon Mərkəzi Xəstəxanasına göndəriliblər.
Baş verən yol-nəqliyyat hadisəsi ilə bağlı araşdırma aparılır.
Tural Rasim oğlu, Bizim.Media, Şimal-Qərb bürosu
