Şimal-qərb bölgəsində hava kəskin dəyişdi - FOTO

Ötən iki gündə şimal-qərb bölgəsində 35 dərəcə isti olduğu halda gecə saatlarından havanın temperaturu kəskin aşağı enib. 

Bizim.Media-nın yerli bürosu xəbər verir ki, Şəki-Zaqatala bölgəsinin dağlıq ərazilərində səhərin erkən saatlarından fasilələrlə yağış yağmağa başlayıb. Elə həmin saatlardan havanın temperaturu da enib. Belə ki, yüksək dağlıq ərazilərdə 17-19, digər aran ərazilərdə isə temperatur 18-20 dərəcə arasında dəyişir. 

Bölgənin turizm imkanları baxımından belə hava şəraiti kimini qane etsə də kənd yaşıl turizm və dağ gəzintisini seçənlər üçün heç də məqbul sayılmır. 

Regional Hidrometerologiya Müəssisəsindən bildirilib ki, qarşıdakı günlərdə də havanın qeyri -sabit keçəcəyi gözlənilir. Bu baxımdan Şəki-Zaqatala bölgəsinə səfərə hazırlaşanlar üst-başlarını qalın etməyi, ən azından özləri ilə çətir götürməyi unutmasınlar. 






Tural Rasim oğlu, Bizim.Media, Şimal-Qərb bürosu