“Bayağı verilişlər cəmiyyətin intellektual səviyyəsini aşağı salır” – Razi Nurullayev  

“Bütün televiziyalara arzum budur ki, bizim efir məkanlarında sağlam tənqid səsləndirən verilişlərin sayı çoxalsın. Yalançı, boğazdan yuxarı təriflər, yaltaqlıq təbliğ edən verilişlər, yerli-yersiz təriflər ölkənin inkişafına yox, geriləməsinə səbəb olur”. 

Bizim.Media xəbər verir ki, bunu parlamentin bugünkü plenar iclasında Milli Cəbhə Partiyasının (MCP) sədri, deputat Razi Nurullayev deyib. 

“Bayağı, çığırtı-bağırtı olan verilişlər cəmiyyətimizin mədəni və intellektual səviyyəsinin aşağı düşməsinə səbəb olur. Onun üçün də gərək biz düşünək. Televiziyalar bu cür verilişlər üzərində reytinq qurub pul qazanmasınlar. Onlara başqa mümkün mənbələrdən pul qazanmağa imkan yaradılsın ki, maliyyə arxasınca düşüb cəmiyyətə lazımsız məlumatlar ötürməsinlər”, - deyə deputat əlavə edib. 

Murad Əhmədov, Bizim.Media