100 il ərzində BU ŞƏHƏRLƏR Yer üzündən silinəcək – SİYAHI

Qlobal istiləşmə nəticəsində buzlaqlar əridikcə dənizlərdə və okeanlarda suyun səviyyəsi yüksəlir. Ərimə sürəti bu şəkildə davam edərsə, yaxın 100 ildə bir çox ölkə və şəhərin su altında qalacağı təxmin edilir. Artıq alimlər suyun qalxmasından sonra yox olmaq təhlükəsi ilə üzləşən ölkələr və şəhərlərin siyahısını tərtib ediblər...

Son 20 ildə qlobal istiləşmənin sürətlə sürətlənməsi və qütb dairələrində buzlaqların əriməsi dünyanı təhdid edəcək ölçülərə çatıb. İş o yerə çatıb ki, bütün buzlaqlar ərisə, okeanlarda və dənizlərdə səviyyənin 65 metr qalxacağı təxmin edilir.

Buzlaqların əriməsi səbəbindən su basacaq ölkələr və şəhərlər sıralanıb.

ABŞ

Əsasən cənub Florida sahil xəttinin çox hissəsi 2050-ci ilə qədər su altında qalacaq. Əslində, Ki Uest şəhəri dəniz səviyyəsinin qalxması səbəbindən daşqınlarla mübarizə aparacaq ilk ABŞ şəhərlərindən biri ola bilər. 2060-cı ilə qədər orada yaşayış üçün yararlı torpaqların 60 faizindən çoxunun su altında qalacağı təxmin edilir.

ABŞ-ın Qərb Sahilində San Fransisko Körfəz Bölgəsi dəniz səviyyəsinin qalxması səbəbindən böyük daşqın təhlükəsi ilə üzləşib. 2050-ci ilə qədər San-Fransisko, Oklend və Foster şəhərinin bəzi hissələrinin su altında qalacağı proqnozlaşdırılır. Dünyanın qeyri-müəyyən gələcəklə üzləşən digər böyük şəhəri Nyu Yorkdur. Əslində bütün Nyu-York ştatı təhlükə altındadır.

CƏNUBİ AMERİKA

Okean səviyyəsi yüksəldikcə Cənubi Amerikanın az qala yarısını təşkil edən Amazon hövzəsi Atlantik okeanı ilə birləşəcək, Asunsion, Buenos-Ayres, Montevideo kimi şəhərlər su altında qalacaq.

MEKSİKA

Meksika körfəzindəki Tabasko ştatı daşqınlara yad deyil və nəticədə tamamilə yox ola bilər. Ştatın kənd yerləri bataqlıqlar və meşələrlə örtülüdür. Artıq mövsümi daşqınlara məruz qalır, lakin dəniz səviyyəsinin qalxması ərazini tamamilə su altında saxlaya bilər.

ŞANXAY

Çinin ən sıx insan məskunlaşdığı yerlərdən biri olan Şanxay su altında qalmaq təhlükəsi ilə üzləşib.

TAYLAND

10 milyona yaxın insanın yaşadığı Taylandın genişlənən paytaxtı Banqkok batmaq üzrədir. Climate Central-ın məlumatlarına görə, çox güman ki, bu, dəniz səviyyəsinin qalxmasından ən çox təsirlənən şəhərlərdən biri olacaq.

HOLLANDİYA

Hollandiya qlobal istiləşmə nəticəsində yaxın min il ərzində su altında qalacaq ölkələrdən biridir. Hollandiya hazırda bu vəziyyətlə mübarizə aparır. 

İNGİLTƏRƏ 

İqlim dəyişikliyi həm də aşağı ərazilərdə yerləşən Şərqi İngiltərənin böyük hissələrini təhdid edir. 

LONDON

İngiltərənin paytaxtı London buzlaqların əriməsindən ən çox təsirlənən şəhərlərdən biri olacaq və böyük ölçüdə sular altında qalacaq.

MALDIV ADALARI

Suları və təbiəti ilə turistlərin üstünlük verdiyi yerlərdən biri olan Maldiv adaları su basma təhlükəsi ilə üzləşən ölkələr sırasındadır. Maldiv adalarının əksəriyyəti problemdən çıxış yolu axtarır. İqlimşünaslar hesab edirlər ki, qlobal istiləşmə ilə mübarizə aparılmasa, Maldiv adalarının gözəllikləri ancaq fotolarda qala bilər.

İSTANBUL

Türkiyə də qlobal istiləşmədən öz payını alır. Sularda proqnozlaşdırılan 60-70 santimetr artım 100 il ərzində baş verərsə, İstanbul da su altında qala bilər.

DANİMARKA

Danimarkanın ən qədim şəhəri olan Ribeinin, Şimal dənizində baş verən dəyişikliklər fonunda gələcəyi sual altındandı.

BELÇİKA

Aşağı Şimal dənizi sahil xəttinin əksəriyyəti ilə yanaşı, Belçikanın sahil xətti və gözəl dənizkənarı şəhərlər yüksələn dəniz səviyyəsinə qarşı son dərəcə həssasdır.

BAHAM ADALARI

2019-cu ildə “Dorian” qasırğasının viran qoyduğu Baham adaları da daxil olmaqla, bir çox kiçik ada dövlətləri gələcəkdə dəniz səviyyəsinin qalxmasından ciddi şəkildə təsirlənəcək.

YUNANISTAN

Termaikos körfəzinin şimal ucunda qurulan Saloniki su ilə əhatə olunub. Möhkəm divarları, çoxlu kilsələri və qədim abidələri ilə ilə bir çox mədəniyyətləri birləşdirən şəhər Aralıq dənizinin təhlükəsi ilə üz-üzə qalacaq ərazilərdən biridir. 

İTALİYA

Aralıq dənizi üçün proqnozlaşdırılan dəniz səviyyəsinin yüksəlməsi saysız-hesabsız inanılmaz yerlərə, xüsusən də Adriatik dənizinin şimal sahillərində təsir edəcək. Venesiyadan fərqli olaraq Aquileia şəhəri daha çox risk altındadır.

İSPANYA

Qərbi Avropanın ən qədim şəhəri olan Kadiz də təhlükə altındadır. Bölgədəki çaylar və Kadiz körfəzi, digər ərazilərlə birlikdə iqlim böhranından daha çox təsirlənəcək.

Bizim.Media